ZWC USA 2008: A kipatna, a laizang, a tawpna-II

ZWC USA 2008: A kipatna, a laizang, a tawpna

Tunkim nitak makaite in "zing ciang cidamin tualpi ah kimu ciat ni" ciin mangpha hong khak uh a, a zingsang zang Ni suak no sitset nuai ah khua tuamtuam pan hong pai tukpeng suihsiam team 12 te kimtakin a hunciam nai 8 in kigual diudeu hi.

3. Suihsiamte Tualpi sung a lutna leh mipi muakna: Zozum pan makaite in "tu in suihsiamte tualpi sung amau puanlap (flag) ciat tawiin hong lutta ding uh hi...... ci a, music makaite in tumging hong tum ziaiziai hi. Tua tak ciang,

Welcome to
ZOMI WORLD CUP - USA 2008
November 27-28, 2008, Ft. Lauderdale
Florida Zomi Innkuan USA

cih kigelhna puan tawi nungak nihte gei ah US flag leh Zomi Innkuan Florida flag tawi nungakte in zom pah a, tuate gei ah suihsiamte amau flag ciat tawh galkap laam bangin hong kizui deudeu a, etlawm in hoih mahmah a, mipi in amaute khempeuh muakna leh pahtawina in khutbeng ziahziah uh hi. Zozum mai a tun uh ciangin tumging khawl a, suihsiamte zong a kigual diudeu in mipi lam nga in hong ding uh hi.

Zinmang Rev. Dr. Tung Za Pau in "kipan ta ni" a cih ding bek ngak in suihsiamte ki om dimdiam hi.

4. ZOMI WORLD CUP USA 2008 Vaidawnna leh Kipatna (Opening Ceremony): Vaidawnna kikhop hunzeek Zolia melhoih mahmah Lia Hungbawi (Lia Huai Sian Hung) in, ZOMI WORLD CUP USA 2008 ah na vekpi un kong muak uh hi.... tu in Pa Mungpi lasa dingin sampah ni... a cih ciangin mipi khempeuh in khutbeng in awng ziahziah a, maitai kim ciat hi. Pa Mungpi in, "Tun sung khat pan piang hi ngeingei hang e...." cih la siamtak in hong awikhia deldel a Zomi la sung pan a kideih pen khat hi cih kigen kullo in kitel sitset ahih manin kilawp mahmah hi. "Zomi ka hih angtang sing maw" ciin dip kihum ciaiciai ciat hi. Tun sung khat pan piang hi ngeingei hang e......

FZI President Pa Thang Do Hang (Pa Hangpi) in a Zopuan bukim a kizem in a dialkaih leh a puansilh tawh Vaidawnna thugen siamtak in hong nei a, "...hih ZOMI WORLD CUP USA 2008 ah hong pai mimal kim Zomi Innkuan min in kong muak uh hi. Hih pen kikholhkhopna (fellowship) hi. Nuam tak in zang ciat ni. Suihsiamte zong na vek un a khatna ngah dingin kong deihsak hi...." ciin muakna, itna, deihsakna leh thupha tawh mipi hong vaidawn hi.

Lasiam San Lun in (Nu San Lun ci ding ka cih leh a lawmnu khat in 'Nu' cih sese kisam kei hong ci ahih manin 'Nu' ka helloh mai hi, 'numei deih a lawmnu in thei' kici ngei ngeel hiven mate?),

"I Zogam Sian in hong tawisang a,
Zomi mipil, misiamte hong pia a,
A hoihna damtui bang hong luan a,
Topa hoihna Zomi'n pak bang tawita"

cih Zogam thupha la khat siamtak in hong sa a, lungsim hong zo in Topa thupha i sante hong phawksak kik deudeu hi. Zomite hampha mah si hang... Topan thupha hong pia hampha mah si hang.....

".....Va bang pilna leh hauhna thuphate hong pia,
Topa min phatlo in i om thei diam?
Topa min phat ciat ni"

ciin lasiam Cingsan sak pen hong awi ciaiciai a, siam taktak hi, zaila awihsiam Zogam awiawi ZO LENGTHE tawh kizawl hi kha ngel inteh...

Zinmang Rev. Dr. Tung Za Pau in, "Tuni a hih banga Zovontawi lia leh tang i kimuhkhop pen Sianmang banzal hi... ci a, mipi lungdam lua in khut kibeng ziahziah hi. Lasiam JK Kam laphuak, "Zomi thupha tung Sianmang banzal ahi" cih bang hong phawksak hi. Limtak ngaihsun leng Sipa thugen pen a bulpi hitakpi hi. Hih ciang i tunna hang pen Pasian gelna bekmah hi takpi ding hi cih kei zong ka um hi. Siapa in Zovontawi lia leh tangte nuamtak-a hun zang ding leh i pianna Zogam nu leh pate mangngilhlo dinga kam vaikhakna a neih khit ciangin bil sik in Siapa thugen kingaihsun ciat hi.

Siapa amah bek hilo a, a angkawi ngaihno, nupi melhoih Sianu Don Ngaih Lian in zong hong uap thei ahih manin mipi khempeuh ki angtang mahmah hi. Sianu pen Zangkong pan kihawmkhia ZONU TONGLUAN kici numei tawh kisai thukizakna laibu hawmkhiat ah thudotpi (advisor) li lak pan khat hi a, US gam sungah hih Zomi numeite thugelh leh numei tawh kisai lai atte a hawmkhia hi. Zomi numeite thu tawh kisai a thei nuamte in amah tung pan kikan thei dingin ka um hi. Zomi numeite mailam leh tu laitak i dinmun, i maban, i kalsuan dan cihte amah a thei khat ahi hi. Tua bek hilo lai, tutung ZOMI WORLD CUP USA 2008 ah Nupi leh naupangte kimawlna makaipi amah ahi hi.

5. ZOMI WORLD CUP USA 2008 Lapi (Zomi World Cup Song): Zomi la phuaksiam Sia T. L. Mungbawi in hih pawi ading ngiat a aphuah la anuai ah kong koih hi. Asa amah leh Zolia melhoih mahmah Lia Cicing ahi uh hi. Ngai dih ni...... a thu (a video bel nei kei ing)...

ZOGAM' ZAITHA

La phuak: TL Mungbawi
Phuah ni: Nov 16th, 2008
La sa: TL Mungbawi leh Cicing

1. Zomi te hong bawl Pasian minthang hen
Zomi ka hihman angtang kipaak ing
Minam lian khanggui kizom te hi hang e
Sian deih cibang teltuam Zomi te...

Cho: Tuunnu Zogam aw zaitha neem lo aw
Na vonte'n giabang hong zuun nung e
Zo ngeina, Zo pau, Zo lai mangngilh kei ning
Singta guallai tubang na ciing ung e...
(Zogam zaitha in nang le kei i hi.)

2. Sianmang in thupha hong pia Zomi te
Singta satsa inn nuam lo nuam sungah
Zoan ne Zotui dawn nautual kikai ta
Hong laamsang Pasian mangngilh kei ni...

3. Zogam aw na vang kisam pha ung e
Lumbang hong sungin thupha hong pia aw
Matutna, mavanna, daupai-gualzawhna
Tung Sianmang siang hong ngetsak in aw...

4. Zomi World Cup aw na khan kumsawt hen
Zomi te ki-itna hong khangsak aw
Tung Pasian Zogam Zominam te ading
Na lian tampi hong semto in aw...

Limtak i et leh a dawng 1na ah Zomite Pasian bawl, Pasian siam minamte i hi a, lungdam hang ciin Amah pahtawi masa hi. A sakkik ah, Zogam aw na lungkham kei in na vontawi Lia leh Taangte in hong zuun ding hi ung, Pasian hong bawl dan mah zahtak in na keem ding hi ung ciin Zogam lungmuang ding in vaikhak, kiciam a, tua kiciamna a tangtungsak ding tuni a paikhawm 'nang leh kei' i hi ciin hong taihilh pah hi.

A dawng 2na ah i sep ding, i tavuan, i duty a sakkik-a mah hong hilh phapha a (kisam pen ahih manin), dawng 3na ah Zogam in thupha hong pia kei leh mavang lo ding, mapai lo ding ahih manin 'thupha dawh' kammal tawh Zogam Thupha ngen hi; Sia Langh Do Khup laibu HAUHNA LEH KHANSAUNA THUSIM sungah thupha pen PA khutsung ah om hi, na pa kiang pan thupha sangin, na la in, na ngen in... a cih tawh kizul mahmah hi. USA i tun hangin i nu i pa i pianna pen ZOGAM ahih manin ama' thupha lo tawh USA ah zong matutzawhna kingahlo ding cih hong phawksak hi. I Zogam mangngilh lo ding leh zahtak ding, it ding cihna hi in ka um hi.

A dawng 4na ah tuni a i zat ZOMI WORLD CUP sungah ki itsemna, kimeltheihna leh kithutuakna te hong khang in nasem khawm, mapang khawm, kalsuan khawm in Zogam leh Zomi ading na lianpi hih pawi hangin semkhawmin khangto le hang cih a deihna hi ding hi. Bei ngeilo a khanto ding, sawt nungta ding, kumsim in kizom den ding, bei cih ngei nawnlo ding cih a deihsakna thupha kammal ahi hi. AMEN.

A phuakpa lah siam, a sakpihnu lah melhoih ahih manin tangvalte bang kamka hek-hawk in ciltui kai liang bang om tham ding hi (en zong a sakpihnu bek mah ki en ahih manin lawmte ciltui kai maw kailo ki en manlo hi...he he..). Zomi ihih mah hampha zel hang.

Lungdam ung la phuaksiam TL Mungbawi. Lungdam.

6. I ngaklah penpen tukpeng suih kipan nuam hita: Kimawlna makaipipa Pa En Lian Pau in thu pulakna leh suihsiamte kiciamna a neihsak khit ciangin Sia Rev. Vungh En Thang in ...Topa aw, na khutsung ah ka vai khempeuh uh kong ap uh hi.... a cih khit ciangin Zinmang Rev.Dr. Tung Za Pau in ..... ZOMI WORLD CUP USA 2008 Pa min, Tapa min, leh Kha Siangtho min tawh ka hawng hi, kipan ta ni..... a cih khit ciangin amai ah a loma mutpuak khihna khauzangte teptan a mutpuakte vantung lamah lengto ciaiciai in mipi lungdam khut beng ziahziah kawmkal pan music kilawmtak hong gingkhia a, tukpeng suihsiamte amau khawlmun ciat ah kikhen in, a sui masa ding ZOMI WORLD CUP USA 2007 Champion Tulsa United Zomi leh Zomi Innkuan Columbus, Ohio te tualpi sungah hong tai lut diamdiam pah uh a, etlawm in mipi in khutbengin kivaidawn ziahziah hi.

Mipi 1000 (tul khat) val kipha ding hi. More than one thousand Zomi gathers at the ZOMI WORLD CUP USA 2008, Thank you Lord.

Phit tum dingpa a laiah paito a, a ngawng tungah a awh a phit a kam ah muam in a khut tawh bawhlung kawk a, phit a tum lian leh Champion hilai Tulsa United Zomi te in bawhlung lingsak in ZOMI WORLD CUP USA 2008 a kipan hi ta hi.

(zop lai ding)


Hau Za Cin
Phuitong Liim