Zomi World Cup nuam a sa ngiat

Zomi World Cup nuam a sa ngiat ZOVONTAWI TUKPENG PAWL:


Captain, ZOVONTAWI TUKPENG PAWL: "Ko Champion kilamen a hong pai hi ve ung...."
ZWC Makaipipa: "No, na nungak neihsun uh 'Pi Lun' hi mawk hiven...."

'Nungak nei kei lua uteh' a ci nuam hi tanghial hi. Nungak hong thapia ding nei kei uh teh, tua bangin gualzawh ding haksa hi... a ci nuam hi veee... Hi mah inteh, nungak hong tonpihte hat thei diak uh sa ing, a khatnate zong a tonpihte uh melhoih lua hiven.... ei zong mai kum ciang aw....

Washington DC pan ZOVONTAWI team te pen a Champion ngiat dinga kilamen, Voktal 2 tawh ai ding ci a akiging phitphet hive ung. Lelh nei hetlo napi ung, knock out stage ah ka suihpihte un hong zo zaw mawk ahih manin ka champion zo kei uh hi. 'Kamsang' pawlkhat in, 'ei hong zo a om leh tuate champion ding hi' ci uh hiven.... phamawh kei, lelh nei lo, amau hong zo hizaw....

Nungak ka neih loh uh hang hong nuihsan kei un, mo hoih a minthang "Pi Lun" in hong makaih manin angtang veve ung. Mo hoih a minthang tampi om ding hi, tua bang mo hoih tampi, mi hoih tampi i neih lak pan khat in hong makaih ahih manin ZOVONTAWI TEAM te nuamsa ngiat hi ung.

Zomi World Cup USA 2008 ah nungak tonpih khak loh pen pawi mahmah. Ka paima uh nipi kalkhat omlai, President Bush phaitam tualpi ah Zomi Innkuan Columbus, OH team tawh ka kidem uh leh amau goal 5-0 hiam khawnga hong zo ziau, ko lello. Amau Ohio pek pan hong taisuk vangvang, nai 6 sung moto a tuan zawh uh ciang hilai ei.... President Bush phaitam pan tai suk vangvang in Miami ka tun uh ciang Miami Veng team te tawh kidem leuleu, ko lel lo, amau goal 5-2 a hong zo. Amau nungak hong tonpih uh hiven. A zingcian nitaklama ka kisin leuleu uh leh practice ground ah Tulsa te zong tung, amau Zolia melhoih sitset khat hong tonpih, tualpi gei ah tu sak biubiau uh... kalai kalai lawmte'n bawhlung sui nawnlo, bawhlung mahmah en nawnlo uh... bangci gualzo thei mawk ding.... a phual pan lah tonpih lo, lampi ah lah kuamah zawn zolo, hui-ha...

ZOVONTAWI te'n, "Tu tung Zomi World Cup pen, bawhlung suih bek hi kei.... Meltheih u leh nau vehna zong hi kawm, lawm leh gual tawh kimuh kikna zong hi, tua ciang 'samsau' pawlkhat tawh kimeltheih kiaukiauna hun zong hi.... (kikhen nitak a ki encim theilote, phone nambat....)

Tua bek zong hi nai kei, "Miami beach lamah khuadak na hun zong hi" ci lai uh e. Mite omdan theihna hun, excursion, study tour.... Miami beach or South Beach kici pen leitunga beach minthang 10 lakah kihel hi a, puansilh a tam zat mello nungak zong tampi nisa ah kipho phengphang hi. Tua mah mite muhnop khat hi. Poh dalh. Zogam pan Zogam Thak tung tuungte ading diak in 'muhnop' limci mahmah khat hi. A omsa, a tengsa te in zong nuamsa veve .... a lamdangpi ahih loh hang theih ding, experience ding te pawl hi. ZOVONTAWI team te bel Tuipi gei pai nuamsa lua, tui bual, kibuan, tui kitheh, bawhlung sui, kidelh, etc.... nuamsa ngiat hi mai.

Tua bek hilo lai; VAPHUAL MAGAZINE, Vol. I kici New Delhi pan kihawmkhia sungah Editor laka khat Rev. Khup Za Go in laigelh siam a sak mahmah leh a thugenna nangawn ah a gen ngei khat, "Pilna Leh Pasian Zia" cih a gelhpa Sia Zam Khai (a sawtlo a PhD USA pan hong zo pah ding) zong ZOVONTAWI team ah hong kihel ahih manin nuam a sa ngiat hi ung. Zomi lakpan computer a siam ngiat (hardware engineer)U Thang (Sia Kam Thang) zong a khuk dom kawmkawm in hong kihel teitei ahih manin hihzahta a tha hong piakna hangin angtang mahmah ung.

Ciah leh kuan, lam tawntungah ciamnuih leh holim hoih nono tawh hong gualnuam sak den Tg. Suantawng hangin zong nuamsa ngiat ung. Amah pen mi tei, mi kiva leh lawmbawl siam ahih mah bangin tukpeng suih sungin zong ZOZUM lamah na kineel manin microphone khawng zong na len man a, mipi nui sak ziahziah, tukpeng suite na ngawn nui beba sak thei ahih manin angtang mahmah ung. Suihsiam ente a gualnuamsak ding thuhoih nono hong pulakkhia ziahziah hi. Ama hang bekbek in zong ZOVONTAWI team te in nuam a sa ngiat hi mai ung.

A siampen te mah champion, thupi takin ai ziahziah uh cih kigalzak ciaiciai a, lungdampih bek hilo ciltui kivalhvalh lel hi. A nihna te in zong tua bang mah a ai, Zinmangte zong sam uh hih tuak, ciltui phulphul lel ei. A guallel lo, ahih hang lah gualzo lote pawl in bel tua bek mah i ngah hilai phot in, eima anbuk sung ciat ah ai mai ni maw.

ZOVONTAWI te ka angtang na diak uh pawlkhat omlai:
1. Mo hoih a minthang Pi Lun in hong makaih angtang mahmah ung.

2. A phual ka tun uh ciang Florida Zomi Innkuan te in "cidam-a hong tung maw" ci a hong vaidawn, hong muak uh ciang ka tawl uh dam pah hi.

3. Nungak ka tonpih nailoh uh hang Miami, Ft. Lauderdale, Palm Beach, Hollywood, leh a kiim pan nupi khempeuh in tha hong pia uh ahih manin angtang mahmah ung.

4. Ka zintunna uh inntekte in 'gilmul vang philphial' a hong koih den uh, a lim a al kicing zihziah, a tui a ha a lim nono tawh hong vak den uh ahih manin nuamsa in angtang mahmah ung. Miami Beach ah hong vakpih uh bek hilo in, 'duh zahzah nekna' mun China Buffet, Hollywood Veng ah nitak an, mangpha khakna ankuang hong umpih lailai uh a, a ciah nuam nawnlo hi mai ung.

[Zogam Thak tung tuung ka tam loh uh hang, tukpeng suih sang nek leh dawn lamsang ah bel Upate in, 'ka muan ka suan' a cihte vive hi vanglak ung in, tua nitak bel China Buffet te sum kisa ngeel kha unteh...he he...]

Mai kum ciang kuan kik ding, tua sang tamvei practice zaw ding... cih te genkhawm in, honuam, gualnuam ka om laitak un hun in hong ngaklo ahih manin,

"Omkhawm lai leng nuam lai,
Hun te'n hong khengta..."

ciin Maryland, Washington DC lam zuan in zan mial tung Solkha taang nuai ah ka ciah ta uh hi. Hun leh kumte hong kivei in Ni thak Kha thak hong suak zongin nunnop ngabang i len hunte ngilh ni om thei ding hiam?

Hasta la vista..
Kimuhkik mateng mangpha!
Au revoir..


Hau Za Cin
Phuitong Liim