SWEET DECEMBER

Kum khatin khasawm le khanih a omna sung ah "Sweet" a kici pen
kha tawpna December kha bek om a, a hun tun kal ding kingak lah mahmah
hi. November kha bei kuan a kipan Sweet Decemebr muak dingin mi
khempeuh kigingkhol in kisa khengkhang hi hang. Leitung bup phialah
vanman nangawn kiniam sak pah ziahziah in, December kha nikhat ni a
kipan Christmas Letsong kipia thei pah hi. Sing tung suang tung mun
khempeuh phialah Sweet Decemebr laimal kigelh zihziah in i lungsim
hong kilamdang sak zo hi. Tua hi leh bang hang kekin December nikhat
ni pen Sweet December kici a, mi khempeuh kilungdam in kimuak sese ai
tam?.

"Sweet" kammal pen Zokam in, A khum (or) A nuam kici thei a, a
khum December cih sangin a nuam December ci leng hoih zaw kilawm zaw
hi. Leitung mawhna pua khia(gum khia) dingin Jesu Khrist hong suah
kha hi in, kamdang khatin gen leng leitung ah nopna le daihna(peace on
earth) hong kipat kha ahihman a hi hi. Hih mikang lai Peace) cih pen
kammal ngaih mahmah khat hi in biakna tuamtuam le mikim in a deih
mahmah khat ahi hi. leitung ah gal kilemna a bawl zote bang zong
(Nobel Peace prize) kipia bek hi. Tua mah bangin Pasian pen kilemna a
bawl Pasian a hih manin a mah tawh a kigalneih ei leitung mite a tapa
jesu Khrist tawh kilemna( Peace with God- Rom.5:1) December kha sungin
hong bawl sak manin min khempeuh sang min lian pen(Jesu in Topa)
kipia hi. Tua hang mahin Decemeber kha zong Sweet Decemebr kici in
nasiatak kimuak ziahziah hi.

Tua hi in hih Decemebr ni khat ni(Sweet December) kammal bang
sangin a thu i tel siam ding thupi zaw lai ding hi. December kha
sungin Jesu Khrist hong suak ci in LST sungah kician in kigelh tuan lo
hi. Mipilte in a hun tawh kinai pen ding a kiciamteh hi in, a ni a
hunte sangin leitung gum khia pa Jesuh i tel(neih) ding thupi zaw
tham hi. Sweet December kammal lel in nopna le daihna hong pia thei hi
loin, nopna le daihna hong puak Jesu Khrist na neihna hang bekin
nopna le daihna kician taktak kingah ding hizaw hi.Tua ahih manin
tukum December nikhat ni(Sweet December)na muakna hangin jesu Khrist
hong puak mihingte telzawhloh lungsim nopna le daihna(Peace of Mind)
thupha namkimte nang leh na innkuante tungah hong tung ta hen ci in
Tongsan pan i kihanthawn hi. Sweet December a khiatna a telsiam ding
leh nuamtak a muak thei ciat dingin laisim mimal kim Topan thupha hong
pia ta hen. ( By: Sia Khampeek-Tongsan Pu)

Minam a ding deihsakna tawh,

Tongsan Pu
Norway pan