Posted by: "Tedim ZoSuan" zosuan@gmail.com zosuan6988
Wed Nov 26, 2008 10:37 pm (PST)
Zomite a huam gai kipawlna (pawlpi) khat neih ding cih pen I minamvai veina
a nei khempeuh phial in thukim ding in um ing. 2001-2003 kim sung khawng
zong ZONET sungah nakpi takin kikupna na om ngei in thei ing.
Tua-ma pek in ZORRO zong tua ngimna mah tawh a kiphut hi a, a hih hang Kawlgam khutnuai Zomite tampi kihel lo a hih manin nisuahna lam Zogam lamah ki thei pha lo
hi. Hih teng bel tangthu I genkik ci phot ni in, mailam ah pawl khat bawl
ding I sawm zawh khak leh thu ngaihsut ding kisam ka sak pawl khat hong
gelh nuam ing. Tunung sawng sung teng kikupna om khempeuh sim khin gai lo ka
hih ciang, mi gensa tawh a kithuap kha om leh hong maisak un. Pawl kician
leh a kho khat hong pian na dingin kimukhawm a kikupna thupi masa cih leh
bang ci bang pawl kitangsam I hiam cih thu nih hong kum nuam ing.
A masa in pawl khat phuh ding lungsim siangtho takin veina I neih leh I
ngaihsutna tuamtuam teng sungkhawm thei ding in kimuhkhopna (Khawmpi) khat
kisam hi. Leitung bup a hi zongin, tuipi gal I ci a gamdang om teng I ci
zongin, a lian mahmah Zomite kipawlna khat din zawh nading pen a hih leh a
thu hong tangzai mahmah ding hi. Deih dan, sepnop dan, kalsuan nop dan a
kibang lo ngaihsutna hoih nono tampi om ding hi. Tua a hih manin pilvang
takin malak ding leh kalsuan khialh loh ding thupi ding hi. Vai tuamtuam
tawh kisai kipawlna a tam zaw pen, democratic principle zui uh a hih leh, mi
pawl khat maitang kituah a kikup tangtang na pan hong piang khia hi.
E-mail
pen manlang leh zat tangzang mahmah a hih hangin maitang kimu a kiho tawh
kibang thei lo hi. Group mail sung khawng ah lungsim taktak leh lungsim
sungtawng dong a sung ngam mi ding pen kikhat mahmah ding a, group mail
sungah ngaihsutna bukim kingah zo lo ding hi. Kipawlna khat peuhpeuh in
ngimna leh nasep dan a gel uh ciangin thusung leh thupua nei hamtang hi. Hih
thusung (mipi' theih a kul lo) te pen maitang kimuhna bek ah kikum thei a,
group mail ah hih ding hi lo hi. Gentehna in ZONET sung bang ah I gal ding
maw I sa ding hiam cih I theihloh mi bangzah om ding hiam cih bang ngaihsut
huai hi. Khangluite in zong "Buipi lei kei in zong khua ngai" na ci sam uh
hi ven maw.
Tuate I kidop kei leh nasem man nai lo in I maban ding teng mi'n
hong thei gai ding a, nawngkaina in hong lap thei ding hi. Kawlte, Vaite gen
vet loh in zong, ei Zomi sung mahmah ah I kidem pih pawl leh namneu
tuamtuam om lai hi cih pen mangngilh loh ding kisam hi. Tuateh, Kimuhkhopna
zong khat vei, nih vei khawng tawh hong kicing thei khol lo lai ding hi. A
masa penpen bang in, tua khawmpi ding a gel leh vaihawm khol ding mi
tangzang pawl khat bang kimuh phot kul lai ding hi. Tua pan bang in koi lai
ah kimu ding, mi bangzah sam zo ding, cik ciang kimu ding cih bang hong
gelkhia thei ding uh hi. Gentehna ah, koi lai ah kimu ding cih bang ngaihsut
huai mahmah khat hi.
Gam lian, gam thupi khawng ah kimuh ding I ut hang gam
tuamtuam panin lutna haksa banah sum tampi bei hi. Gam hau a om te gamzawng
ah lutna baih banah a lamsap ding uh haksa sa lo ding uh hi. Gentehna pak
bek hi, kimuhna a om ciang ngaihsutna hoih zaw tampi hong dawk ding hi. A
tungah I gensa mah bangin, khawmpi taktak ciang zong pawlpi kiphut khia zo
thei, kiphut zo lo thei lai hi. A hih hangin maban khat peuhmah hong om sam
ding a, a tangtun dong zop tohtoh ding a kul ding bek hi. I gensa teng
tomkaih leng, pawlpi phuh ma in kimuhkhopna khat kisam pelmawh a, tua ding a
madawk in gelna a nei khawm ding mi tangzang pawl khat zong kisam hi.
Thu nih na ah, zomi te kipawlna pen khat bek a kisam ki hi zaw lo in,
kipawlna nam tuamtuam kisam I hi zaw hi.
Minam picing khat I suah zawh nading leh minam a ding nasepna tangzai I neih theih nading in sociopolitical kipawlna thahat honkhat I kitangsam hi. Gam leh Nam vaihawm
pawl, khantohna vaihawm pawl, cidamna leh pilna vaihawm pawl, ngeina & lai
kepcing leh laptohna vai, numeite laptohna vaihawm pawl cih leh a dangdang I
gen khak loh vai tampi hong hawm ding kipawlna thahat tampi I kisam hi. Hih
I gen vai teng a hawm zo ding in kipawlna khat bek kicing zo ngei lo ding
hi. Kumpi ten a hih leh bel mipi kiang ah siah dong uh a hih manin vaihawm
zo mai thei hi. Ei I hih leh tulaitak kumpi dinmun hi zo lo I hih manin
kipawlna khat peuhpeuh I neih sawm leh vai khempeuh a huamkim kipawlna hi
lo in paizia kalsuanzia ciangtan kician nei khat a hih ding hoih hi.
Ei tawh a kigamla lo etteh theih pak ding in, I sanggam Lai (Pawite) political
forum, human rights organization cih bang in a khenkhen in nei uh hi ( A
sungthu uh ah bel pumkhat bangin pangkhawm veve uh hi). Khau sau lua kikai
awk I cih mah bangin I huam sawmna pen I sepzawhna sang a gol zawk luat leh
bangmah mumal mel nei lo, pawlpi si hong suak thei hi. Thu khat leuleu ah,
gamdang om Zomi hiam, gam tuamtuam Zomi hiam cih min puaksak kawmkawm in
pampaih leh deihtuam I neih leh lah hong dik lo leuleu ding hi. Zomi I cih
nak leh I nuntakna tual niam maw, tual sang maw cih om lo in piciang (ruler)
kibang khat tawh teh kul hi.
Ei Zomite thutang, thudik deihte I hi hi.Leitung bup Zomi maw, tuipi galkai Zomi maw khat zaw sangsang I cih sawm leh gam neu, gam lian om tuam lo in Zomi khempeuh huam hi. Omna gam a kibat kei nak leh gamdang mi I hi tek hi. I lungsim in huam zawh loh I neih leh a min in zong huam loh ding thupi hi. I thucin khat ah zong kituak lo pipi a min pha pipi phuakte a daupai lo thei a min pualah (pua zo lo) kici cih om thei hi ven maw. A tunga I gen bangin khawmpi I neih theih leh bang lam a sem,
bang tan a huam kipawlna bawl ding cih bang pen kikup ding vai thupi khat
hong suak ding hi.
Kawlgam, Vaigam mun dang ah I neihsa kipawlna pawl khat
pen a zia a tong kibat pih pawl dang tawh kizom a nasem khawm thei ding a
pian theih nading a ut huai pawl khat om hi. Lai, ngeina, biakna, siamsin
kipawlna cih teng bang. Kawlgam Zomite sung ah lai lam ah ZCLS, la lam ah
ZOMUS bang I neih pen a hampha I hi a, phungvuh in Mallam a a nasep dan uh
a kibatpih pawl khat tawh kizom a na hong sepkhop ding uh ut huai lai hi.
Kawlgam, Vaigam leh gamdang ah khua tuamtuam sung ah Donghu leh Khuado bawl
nading kipawlna pipi nono I neihte pen a hih leh a tuam tekin suakta tak in
ding lel le uh hoih hi. Hih dan kipawlnate kikal ah sepkhop, pankhop ding om
mel lo hi. Khantohna lam vaihawm ding pawl kician om nai lo hi. Namvai leh
gamvai ah Kawlgam ah ZNC, Vaigam ah ZRO, ZC cih bang I neih hang pankhopna
om lo hi in thahat zo taktak lo uh hi. Kawl gam leh Vaigam pualam om Zomite
in gam leh nam vai kipawlna (political organization) nei lo tagahte a hi gai
uh hi. Gam leh nam vai in thu dang teng huam gai phial a hih manin I
gimneih, lipkhap leh lauthawng bawl sang in deihtak in pomcip vet ding thu
hoih a hi hi.
I pelh bawlbawl hang I nisim nuntakna ah kisawh khak loh
phamawh den kei hi. Laho zong I kisawh khak bek leh na mahmah a, mekcip leng
na lo vet leuleu hi. Ka neulai kel-an zonna pan ka muhkhiat thu lian mahmah
khat hi. A tunga I gen teng tom lak kik hi ta le hang, I gen nop thu pen in
ah Zomite in I vaihawm ding kisam thu tampi om a, tuate I sep zawh nading in
kipawlna lian pipi tampi I bawl ding kisam hi cih ding hi.
Thukhupna ah, a thahat, kizen leh lawhcing Zomite kipawlna (Pawlpi) khat
peuhpeuh I neih zawh nading in kimuhkhopna khawmpi khat neih ding thupi a,
tua khawmpi sungah I kitang sap pawl tuamtuam tampi sung lak pan khat
peuhmah dinkhiat sak masak photphot zawh nading vaihawm hun mawk ta hi.
Pankhopna in thahatna hi a, tal kisi liang a kikupna pan a lampi ding hong
kilang ding hi.
--
ZoSuan
No comments:
Post a Comment