ZWC USA 2008 ah Zomi Makai pawlkhat tawh kimu:

I ngaklah mahmah Christmas leh Kumthak hong naita ahih manin i Zomi World Cup thu a omlai teng khin vet dih ni maw....

Zomi World Cup USA 2008 ah Zomi makai honkhat tawh ka kimu uh hi. Amau tawh liangko kinawk hialhial a tukpeng suihna kiim ah din khop liliai hunte mitkha ah thaam den mah leh hun leh nite in hong kheng hiaihiai ahih manin lai tawh kiciamteh kei leh mihing lungsim ciamteh theihna in sawt kholo ahih manin kimangngilh kha ding hi. Amaute pen i minam adinga ahih theih ciang vua hanciam leh mapangte ahi uh hi. FZI makaite a nunggual ah tusak ni in, zin leh leengte a maigual ah tusak dih ni. FZI te bel zindo a siam bek hilo in inntek hih dan zong a siam peuhmah uh ahih manin thupi ngiat uh hi.

1. Sia Rev. Tung Za Pau, OH pen tu kum Zomi World Cup ah i ZINMANG ding ahih hangin telephone tawh ka kigal ho zel ka hih manin ka kimuh ciil un ka zahtakna kiam hetlo napi ka maingap pah hi. Maingap pah theih dingin zong omsiam hi, mipi lungsim nei mawk ahih manin. A mel ka khatvei muhna hi a, ka upmawh zah in hoih a, ka upmawh sangin na khangno zaw hi. Ama hong genna bang ah "Zomi Innkuan Columbus, OH tukpeng team ah zong akimawl den khat" hi mawk hi. Tu kum kimawlna ah tukpeng suih hat penpen Sia Khai te khawng neita uh ahih manin Siapa in a suih kisam nawnlo hi kha kei leh Siapa in tukpeng a neelnuai kimu ding hi a....Zawhngeu Zusa ciammuihpih bel thuneulua ding....

2. Sianu Don Ngaih Lian, OH pen Siapa zi hi. Amau gel bek mah NGAIH ANGLAI AH te Cingno leh Thangno te bang hialhial in a tenna uh America leilu lam pan tai tul 3 val bang amau moto tawh hong taisuk hialhial in nang leh kei leh i minam Zomi a khualna uh tawh sum leh pai tha leh ngal pilna siamna siit hetlo in a hun tampi uh hong zatpih vua, thuhoih nono hong mop in i nuntakpih ding pilna tampi hong hilh uh hi. Tuate i ciamteh nawn kei leh bel ei thu hi. Sianu hong hihpih naupang leh numeite kidemna tuamtuamte thupi a, medal ngahte i lungdampih hi. Amah pen ZONU TONGLUAN thudotpi ahih mah bangin innsung khuasung leh numei tawh kisai theihnop i neihte i dot theih den ZONU melhoih liitliat khat ahih hi.

3. Sia Rev. Kap Mang, President, Zomi Innkuan Oklahoma tawh ZWC USA 2008 tunkim nitak Captain Meeting ah ka kimu kha uh a, amah pen a mel et in zong mikangte in 'sportman' a cihte uh hi in, a tha kipua in, ki fit mahmah a, lah gawnglo, lah thaulo, US tung Zomi lakah a ki ukzo mahmah khat hi cih a mel i muh phet in zong kitel pah hi. Annek kidawm zolo, pumpi kikem zolo tampi Ngapiknete gam ah gawng ginggeng napi US a tun uh ciang 'zusa mutpuak' bang thei uh hi. Oklahoma state ah i Zomi makaipipa pen mi ki discipline mahmah khat hi ding cih ka muh dan hi.

A pawlte tha a piak siam dan, a huai siam dan, gualzo in guallel ta leh picing lungsim pua in maitai den a, mi zahtakhuai mahmah khat hi. Zomi te in hih bang makai i neih hampha hang. Tua bang makaipi tawh hih Zomi World Cup hun ah ka kimuhkhak hampha kisa ing.

4. Sia Kappu, GA pen a thu ka galzak ngei khat hi a, amah ka muh ngei hilo hi. Tukpeng suih a masa ni in ZOVONTAWI team khawlmun gei ah papi kiva mahmah mel khat leh nupi tangzang mahmah mel khat ka mu vat a, ka nunghei leh a khut hong sawksuk dendan in, "Kei Sia Kappu hi ing ei, hih ka nunga pen ka innteknu hi" hong cih khit ciangin "hi maw" ciin ka kikhutlet vua, Zomi leh Zomi kimu pen i khatveina ahih hangin sisan khat, minam khat, tuunsung khat piang ihih manin kingaina pah, ki it pah hi hang. Zomi ihih mah nuam nguainguai ei maw.....

"ZONET pan na lai atte ka na sim zel a, kong muh ngeiloh hang na min na za ngei ing..." ciin Sia takpi hong kiphahniam in kei naupangno khat mai ah kamsiam hong zat ciang, ....Aw! I Topa Zeisu zong a thupi na tampi lakah khat pen Pasian tapa takpi mihing banga hong kiniamkhiatna hive'n maw... . ka ci a, mi a pil deuhdeuh leh kiniamkhiat deuhdeuh uh cih pen 'hi mah si e maw'...... A kiniamkhiat khempeuh a niam hi hetlo in ei sangin a sanglua mahmahte na hizaw thei cih khawng ka phawk kik a, Christmas thupuak tawh kibang kasa mai hi.

5. Sia Khenno, ken Talekkhennosda ci a ka theih zawk leh, ka laibu, KA LAIKUNG PANIN bu 50 khatvei thu a hong leisak - minam leh khua leh tui a deihsakpa in ZOMI CONSERT nitak in FZI makaipipa tawh ka tutkhawm laitak un ka gei pan hong hopih in, "Kei tua hi ing ei...." ciin hong kigen a, "Nu ei, nang kong muhnop tawntung, lah ka lamet hetloh tu in a kimu hi mawk hang e, " ciin kei zong ka khut ka sawkphei teta a ka kikhutlet uh hi.

Sia Khenno pen mi dik hithiat, pau hiathiat leh thunuam mahmah khat na hi a, Zomi pasal lak pan a thagol pawl thadim leh a kilawm khop lian a thahoih ahi hi. Nupi te kimu ciil lungdam lua in, "kimu kei leng kimu leng ci hang e, kimu leng lah i gen ding bei" a cih uh bangin lungdam luat man hiam gen masak ding zong kitheilo in ka om uh hi. Zomi World Cup thupi bawl leh a siim ding ngiat a gamlapi pan vanleng tawh hong leng vangvang Sia Khenno tawh kikhen ding zana ka kimuh pat pen kimuhloh sang ahoihzawk hangin hun nei a holim ut huaina khangsak lua hi.

6. Sia Dr. Pau Khen Mung, FL pen tu kum Zomi World Cup ah tukpeng suihdan a tangkopa (Commentator) hi. Zozum ah tu in microphone a khut taklam ah, naungek a khut veilam ah tawi (hia leh, tel nawn kei mawk ing ei) hi in nupi te in Bal a tuh uh cianga a phungpha, a tak mahmah a ke hau a limci bang siasua in a khut vei leh tak awl mahmah lo hi. Himah tase leh ama duty Commentator nasep pen pelem vetlo in sem a, tukpeng suite suihdan i muh khak loh, i et man loh laitak zong a aw za peuh leng i mitkha ah kibawl kik thei a, kitel zaw hi. Tua zaha siam Commentator Zomi makai khat i Zomi World Cup ah kihel in kei zong ka mit teekteek tawh mu kha ka hih manin hampha ka kisa hi. Commentator siam a kisapna na tel nop leh na TV hong inla, tukpeng suite video na et laitak in a ging sumit lecin, commentator kisapna na tel pah lian ding hi.

7. Sia Mengpu (Rev. Thawng Lian Khup), FL: Penalty na khum kha hi zen leh maw.... final ah.... champion.... . Tuate mangngilh pak ni in; Zomi World Cup a thupisak leh a picingsak, a gualnuam sak mahmah khat pen Siapa a white shirt suah in tukpeng puan hong silh in tualpi sungah goal khum sawma hong tai ziahziah pen hi. Kum 60 kiim a pha (a val, a cing nailo - koizaw tel keng) Pastor khat Zomi World Cup ah tukpeng sui cih pen ngaihsun kik taktak leng thupi hi, Zomi ihih a nopna hong khangsak hi. Zomi hih hong angtangsak hi. Pulpit tung pan thugen bek hi kei, gamtat leh omdan pan zong mite in Sermon tampi kiza, kingai thei himawk hi. Topa nasep dan lamdang sa ing.

Siapa zi Sianu in tunkim nitak Captain meeting ah

"Welcome to
ZOMI WORLD CUP USA 2008
Florida Zomi Innkuan

ZOMI DELIGATE MEETING
Nov. 26, 2008"

cih ama khut tektek tawh a gelh ngiatngiat khawng mitkha ah thaam den lai e. Siate hangin nakpi in khamuang, lungnuam in ki angtang mahmah hi.

8. Sia Rev. Vungh En Thang, FL: Siapa leh sianu te zong Tukpeng suih a masa ni in tualpi sungah suihsiamte kidelh ziahziah ka et laitak in ka liangko pan hong hopih siausiau khat om a ka nunghei leh amau nupa lungdam maitai a ding linlian na hi mawk hi. Bang cih ta ding. A inn nuam tak vua Buhsih leh Sa gilmul kigamla lianga ka nek ka dawn lai uh mitkha ah hong lang a, hun lui sapkik theih kei mah leh lungsim in hawlkik dandan hi.

Amah pen FZI te TULPIPA hi a, biakna makaipipa ahi hi. Sianu lah melhoih, lah kamsiam, maitai ahih manin muh phet a maingap theih pah dinga om siamte ahi uh hi. Zomi makaite thunuam thei mahmah uh a, amau vaang ah Zomi World Cup siimte khempeuh ka khamuang mahmah uh hi.

9. Pa Thang Do Hang (Pa Hangpi), President, Florida Zomi Innkuan (FZI) pen Zomi World Cup kipat ni zingsanga akizep dan pan thupi kasak pah hi. Vaphual tal bangin a lukhu kilawm tak tawh hong ding ziazua a, etlawm in a gal pan zong hoih kisa in ki enen mai hi. A kizepna pan ZOMI ahih na kilang pah a, Zopuan leh Zomi van tawh hong kizep pah ciangin Zomi i hih hong angtang sak mahmah hi. Tukpak ton a lukhu nelkaai khu i Zomi galhang leh gual tungtuangte mitkha ah ong musak hi.

FZI makaite kipiakzawhna leh a hahkat man bekbek vua hih ZWC USA 2008 a lawhcing, a nuam, a thupi hi i cilo thei kei hi. Ei a zin leh lengte om in, a mipi om in himah leh a makaite hanciam lo in a kisam khatpeuh ngaihsun pahpah kei le uh i khoppi hihzah in nuamlo ding hi. A masa ni i lawmte khat i moto tohlet maan (window glass) hong kikhawnkhap sak tak ciangin a ni nihna tak ciang FZI makaipipa zong tukpeng en man nawnlo, a seppihte zong huai man nawnlo in tua sanga thupizaw security nasep hong sem a, eite'n nop i sak theihna dingin amau na gim uh hi (sacrifice) uh hi. Mipi te lungmuang taka suihsiamte i et theihna dingin makaite in i vante, i motote hong cinh sak uh, hong kepsak uh hi.

Pasian in nuntak tawntungna i ngahna dingin a Tapa hong piak bangin Zomi khempeuh in nuamtak a hun i zat theihna dingin FZI makaite in a muhnop mahmah tukpeng suihsiamte kidelh en man lo uh hi. Hih bang makai hoih nei ihih manin lungmuan huai hi. Zomite hampha hang.

10. Pa Khaipi, FL: Amah pen FZI ah Vice President hi a, tu in President dingin kitel cih khat za hiau ing (thucian bel thei nai keng). Khual gamla pipi pan zin leh leng hong tung in, moto tawh, vanleng tawh Zomi te in Florida Zomi Innkuan lam a zawt ziahziah laitak un, a gim a tawl uh a dawn dingin FZI te gelsiamna tawh makaipite hong vak kawikawi uh a, "nong gim uh hiam, nong lamzang uh hiam, kisap na nei uh hiam...." cih bangin hong vaitun uh a, i zinna i gim i tawlna teng huih muut bangin bei mang hiau hi.

Amah pen zinmuak, vaidawn bek a siam na hilo a, lasiam mahmah khat zong na himawk cih hih Zomi World Cup pan thei pan ing ei.......... a kikhaihsiang nailo suangmanpha (unpolished diamond).... manpha mahmah napi a manphatna zah a kizang nailo....

Hih banga kizen makaite in a sep khawm tak uh ciangin amau sepding, tavuan ciat zo takin sem uh a, a neu lua omlo, a lianlua omlo, sep ding ahih peuhmah leh sempah ahih manin tukum Zomi World Cup pen a nuam penpen World Cup ahi hi, ciin kei ka ciamteh hi.

Makai hoih i cih pen makaih a siam bek hilo in amah za laih ding midang a pattah siamte hi a kicih mah bangin tu laitak a makaite in a hanciamna leh a sepkhop dan uh, a pankhawm dan uh a nua ciang makai sem dingte in mu ding, etteh ding, thei ding, mu ziziai ding ahih manin amau pen Makai Hoih i cihte ahi uh hi.

Hih bang hun nuam ah Zomi makai tampi tawh kimu kha ka hih manin hampha ing. A vekpi in kimu manlo, kiho manlo, kikhawl manlo...... mi zong kigualnuam gawp veve ta ahih manin ka kimuhpih khak loh zong tamzaw tham dingin ka um hi. Mai kum lam ciang tua sang a tamzaw tawh kimu lai dingin ka kilamen hi.

Topa in i makaite thupha pia in hong kepsak henla; pilna, siamna, ciimna leh thutheihna te hong piaksak henla; ei amau nungzui Zomi namte khempeuh amau makaihna zui siam ding leh a kisapna te uh thuap a, tawsawn a panpih leh semkhawm diamdiam dingin a kicing thanuamna leh pilnate hong pia ciatta hen.

Gen khial a om leh hong maisak un.


Hau Za Cin
Phuitong Liim