Pu Vumson Inn Pan

Posted by: "suante2002@yahoo.com" suante2002@yahoo.com suante2002
Tue Jun 9, 2009 8:40 am (PDT)





Pu Vumson Inn Pan:


A tate zong amah tunna ciang a tungsak Pu Vumson, Ph.D. Inn ah zan nih ka giak khit ciangin hih lai themkhat atlo in ka om thei kei hi. Ka lupna a khan 2na tohlet pan ka khuadak ciangin a kim leh pam a mipi vak zaizaite, inn leh inn kikal ah lono hing dipdep a po zihziahte, inn gei singkungpi khat a po gemgam tungah Mu leh vasa neu tuamtuam hong tu a lengkhia zelte leh vasa leh lengthe ham ciauciaute in Zogim nam sak vangvang hi. A gala mawtaw tai ging luum henhan leh inn tung leh inn nuai kileh a pai sanggamte khekhap gingte, ann huanbuk pan hong zaam to hiaihiai meh namtui gim kiza vauvaute in Zo Inn a hihna kipsak semsem kasa hi.

Ka mai ah Topa sawl, Ama sathau nilh Sia Dr. Thuam Cin Khai na paizo a, ama lupna mah ah kei zong siapa zawh ciang zannih Pu Vumson Inn sungah ka giak hi. Siapa in Nipini kikhopna ah Topa annkuang hong lui bek hilo in, "Saul pan Paul" nuntakna thu kician takin hong tangko a, nuntakna lui leh nuntakna thak muh theih dingin hong lak hi. Thugen lah siam, thugen lah tom, zong hanciam in khangno vai mahmah a, ka mai ah pai dingin Topa'n na sawl a, ama khekhap ah (ama lupna ngei ah) ka lup ciangin ka kha muang in ka ihmut hong nuam mahmah hi.

Siapa giah nitak mah bangin kei zong ka tun ciang naute nih Tg. Kimpi leh Tg. Mang te in ka internet etna ding hong zopsak, a khau hong pehsak, ka lupna ding puan leh delhphahte phahsa in na koihsak dimdiam uh a, ann leh tui kicing takin hong lui zihziah uh hi. US pen a nuam hi mawk hi. A tengsuak ding Zomi te hampha kasa a, Zogam Thak a nopna a ciam kha pak bek in ka kithei hi. A ne dingte hampha zaw tham hi.

Ka tun nitak in zan kim phial hita mah leh hong it a, hong delh vingveng Pu Vumson naupa Pa Ngocinthawng leh a zi Nu Cingkok te thusiamna te ka muh ciangin ka tawl hong dam pah a, ngaihmuang takin nuihciam lel in ka holim zihziah uh hi. Ahi zongin hun in hong ngaklo ahih manin zingsang ak masa khuan ma in ka kikhen kik uh hi. Zomi ki itna Zogam Thak ah tul nailo hi. Zangkong khawng ah a tul zongin Zogam Thak ah tul nailo hi!

Washington DC khuapi sungah ka vak kawikawi na uh panin President thak Mr. Obama kiciam ni a mipi tulza 25 (2.5 millions) khawng kumpi innpi maiah dim zihziah a kigualte ka muh khak loh khawng pammaih kasa a, a hawmpi a va muh sangin thupizaw thamtham ding cih ka ngaihsut ciangin 'pammaih' kasa hi. "Hun Hoih" i cih pen pelh kha le hang, pawisi e, pammaih si e, cih tawh kisikna bek kigengen thei hi. Tua hi a, 'sun ni a taan laitengin na hoih sem ni, Topa thukimpih nasep hoih sem ni'

Zogam thak ah a tengsuak dingte, a teng dinga tung lai dingte, a zinpak te in hih Inn amuh sim un, hih inn a nawkkhak sim un a thupina na suut cim theilo ding uh hi.

A kiam ngeilo Zomi ki itna lahna inn hi a, inntek tanga na thungkuah na ngak ngamna ding inn hi. A vom a kang tawh kihel minam omna Zogam Thak ah om ahih hangin Zongeina hoih teng leh ki itna, kikhualna, kideihsakna, kihuaina, kithupisimna, kipattahna, kilapsangna, kipahtawina, ankhing tuibuk kipiakna mun ahi hi.

Hih inn a khanto ta hen.

Inn hoih inn nuam tampi om a, a sungah nuam kisa khin lo hi. Zin leh leng kingakna hi khin khollo hi. A sungah tengte zong kisap om kikeuhlo napi nuamsa mahmah lo thei uh hi. Ahi zongin hih inn pen tua bang hilo a, a nopna Zolimtui bang kidawn cim theilo hi.

Pu Vumson Inn pan,



Hau Za Cin
Phuitong Liim
June 9, 2009

Dear Lawmte,
Pu Dr. Vuym Son' Inn cih thupi a Dr Cinpu in hong gelh ka sim leh kei zong 1998 August ka hawh masak lai-a, a Toyota Pick-up san (Red) tawh Riverdale, MD a Pa Thawngte inn pan hong pua khia in sai khatah ka lutkhit uh ciangin a inn ka tung uh hi. Tua lai in a living room ah Vaiphei-Zomi nam puan a kang leh a san leh i Zopuan dang nih leh thum tawh a baang (wall) na zem a, kilawm bek hilo-in Zomite hong itna leh hong khualna thupi ka sa hi.

A inn khan ka kah toh leh living room lianpi carpet kipha zihziah om a, Pa Son lian, nuam, kilawm si e, ka cih leh aman, "Hi khan pen Zomi ong tung thak, nasep zong lai, omna nei zolote omna leh giahna munpi hi. A beisa kum 7-8 lai in Zo minam cin -Khalkha. Falam, Mizo, etc.etc. 10 val bang giakin kipatna muna aneih uh hi," hong ci hi. Tua bangin kuamah deidan neilo-a a thukhualna thupi ka sa hi.

Khatvei lawm Pau Khan Mung tawh kithuah in Pa Son hong huhnate i lungdam lawmlawm ahih teh, meh ding lei in Pa Son kangah lungdam thu puak ni, ci in ka hawh uh hi. Pa Son in, "Lungdam si e, hi banga lungdam thu hong genkik tam het lo hi. An huan buk ah no mau duh dandan in huan un, Ken sa khawng amah beka huan sangin anteh neng khawng tawh huan le hang cidam huai sa zaw ka hi," hong ci hi. Aman a cidamna dingmah ci in annek ciangin tangkha (bitter gourd (?)) tawm khat ne thei zelzel hi. "Sa bekbek meh pen hoih lo hi aw, naute," hong ci hi. Tuni dong tua a thugen ka zuihzawh dandanin ka zui a, Pasian hehpihna tawh pumpi tawh kituak zaw bangin ka mu hi.

Pa Son in, " Zomi US tung masasa in laisim mah hahkat un aw ci tangtang hi. Kei kiangah, Mangkam zong nang ading ciang gelh thei pau thei lel na hih manin Law sin in. Zomite kisam mahmah hi. Koi munpeuhah na om zongin na zang thei ding hi. Tua banah , l lai na sim uh leh na kivakna dingun simpah un," hong ci ngei hi. Hih thu mah pen tulaitak adiakin US a Zomi a omte in i zuih dingin thupi ka sa lailai hi.

Pa Son pen a inn bek thupi lo-in, a lungsim picing ka sa ngiat hi.

Pa Son phawkna leh zahtakna tawh,

Ngaih Lian
Guwahati

Dr.S. Neng Ngaih Lian

Sunshine Cottage

H.No.21, Bishnu Path

Mathura Nagar, Guwahati -781 006