Numei te cih dan:

Thu konghong:Tam ka theih loh hang ka theih bangbang hong gen pong ning e. Ahang pen numeite pen leitung nuntak a nuamsak bek hilo in a haksa sak, a gimhuai sak zong hi a, nuihna a piak bangun kahna zong pia hi. Adam adingin lungnopna leh lawm hi masa a, a dahna leh a khasiatna Pasian tawh a kigamlatna ding a hong piang zong ahi hi. A Pasian a buksanna ding donga maizumna a piangsak, a kisungsiasak, a zakta sak pen numei mah na hi kik hi. Ahi zongin nopna dahna thuak ta leh a nuntakpih a kikholhpih a lawm hoih penpen numei mah na hi ve ve hi. Tua ahih manin thuneu lo a, thu simloh loh ding hilo a, ahihna bang theihsiam a kisam hizaw kha ding hi. Heh mana ciang tawh sat pah ding hilo a, lungdam mana pahtawi luat lawmlawm pah ding zong hih tuak lo hi. Ahihna banga theihsiam a kisam hih tuak hi. Ahang pen - kap sak leh hehpih huai diak a, pahtawi lua le'ng a hun ciang theilo in 'hon ci phei, hon ci phei' uh hih tuak hi (ken bel thei lian nai kei ing). Tua manin Numeite cih dan - woman tactics ci ding i hiam, numeite lungsim zatdan pen a lamdang, gul bang in a pillua hi a, pasal te in ki lel mahmah mai hi. A cihna lamlam vuah kihawi dawidawi mai dan hi. Ut ta kei leeng kinang siamlo (kinang zolo hilo in, a nan dan ding kitheilo, a nan dan ding omlo a mau hong heizo, hong sawlzo, hong peizo, i nanna ding lampite zong amau thei khin ahih cianga tua pelh kawmkawm kamsaw dan siam uh - I have to admit it honestly), nuam teei ei leitung pen. Hih pen nuntakna cingtaak akici te hi dingin um ing!Le, thulu ah lut leeng - 1. Hawhna vakna ding neih ciang themcik khat a ki ziakai sak uh pen a manlang loh man hilo, a zia a kai hilo, na ngakzo takpi hiam cih a tel nopna pak hizaw. Ama adingin na hun na hawmzo takpi hiam, na khualzo takpi hiam cih a thei nuam........ . 2. Niangtui dawn khop ciang a dawn man nang piak ding a ngaihsut pah ziau pen nang sum hauzaw teh cihna hi lo in nang hong muangzo ing, hong muang ngam ing, hong muang ngiat ing a cihna hi zaw......... . (nang zong lawmnu mai ah a nei mahmah dan a kilang nuam pak na hih cianga, she knows your male - ego, na ki pasalsakna hong theisim lua hiven). 3. A heh a khasiat ciang khamuanna bitna, panpih, lungsim thapiakna kisam pha diak ahih manin tua pen pasal bek in pia thei hi, a kingeksak hilo a, bel kitambaih zaw ahihna a kilatna hi. 4. Neucik ah lungdam, neucik ah khasia thei ahih manin a lungdamna ding bekbek ngaihsun leng a khasiatna ding zong neu semsem hi. 5. 'Nong ciah ding lah nong hilh masa kei a...' a cih uh ciang a thei nuam takpi hi tuanlo in amah ki thupi bawl masa leh a utna, a deihna hi (CNN thulu: Be the first to know cih pen a ut uh hi mawk hi, lawmte kiangah a kisialhna ding uh zong hi kha maithei, theisam lo). 6. 'Mi kiangah ciamnuih na gen a, ko kiangah na gen ngei kei' a cih uh ciang bang a cihnopna uh ahi tam..... midang a haza hi diam, a el hi diam, kidempih nuam a hi diam, ahih kei leh aman zong ciamnuih za nuam takpi ahi diam?Tampi omlai inteh. Sun ni lah tum ta, Ngaih tawh lah khawllo...pawl in tam kithei kei mawk e. A theilo pen in hih zah gelh ding thei ing e.
Hau Za CinPhuitong Liim