Chin Sian Thang Sitni toh kisai tawm

Kawl gam galkap kumpi te’n haksatna tuamtuam a tuah laitak un a lang pang pawlpi te ma nawt ding a hihi. – Pu Cin Sian Thang.

Hih kammal pen kawlgam sungah kumpi langpang mite sihna hanmual lam zuan dingin a kisawl lai tak leh kammal khat na ngawn tawh kumpi te hoih lohna a gen mite kum ( 7) thong ( jail) sungah a kikoih hun laitak in launa nei hetlo a, a ma upna a sem i makai Pu Cin Sian Thang gen kam mal a hihi. Kawl gam sung ki ukna pen thu kham leh dan ( the rule of law) tawh ki uk hi lo a, mi mal ( galkap te) te’n a mau muk pan a pusuak kammal te leh thaulong tawh vaihawmna gam a hihi. A mau ( galkap te ) a lang pang leh a mau thuneihna leh vaihawmna a linglawng sak thei ding mite pen a gawt mahmah na gam hi a, Shan National League for Democracy ( SNLD) ah Chairman a sem U Khun Htun Oo zong a ma mipih ( Shan) te tawh kawlgam thu khunpi huang sung mah mah ah a mau (Shan) minam leh gam khantohna ding thu kikupna a neih man un kum ( 93) thong tang dingin SPDC in thu khen lai tak un hih a tunga bangin Pu Cin Sian thang in hangsan tak in kumpi te nasepna a deih lohna pulak ngam mi hangsan khat a
hihi.
Pu Cin Sian Thang pen Zomi te lak ah lawyer a sem ma sa pen a hih manin kawl gam sung a om Zomi te’n Sittni pa cileng Pu Cin Sian Thang a kigen a hih lam kuamah in haih lo hi. A mah pen law ( Upadi) bek a uk hi lo a, Zomi te a dingin gam leh nam vai a uk mahmah leh a kin mahmah khat hi a, a sangkah hun lai pek a kipan in kawlgam politik sungah Zomi te tawh kisai thu kikupna sungah a kihel zelzel mi khat a hihi. 1962 kum Shan gamke Taungyi khuapi ah kawlgam sung constitution puahphatna ding tawh kisai thu kaihkhopna ( seminar) ah zong a mah kihel a, tua hun lai tak a Chin vuanzi a sem Pu Za Hre Lian in Zogam tawh kisai mipi deihna zui lo a a thugen te hangsan tak in a langpang leh a nial mi hangsan khat hi a, kawlgam leh Zomi te in gam ki lam khiatzia ding federalism mah deih ung a ci ngam pa khat a hihi.
1988 kum kawl gam bup mipi sosang na hangin U Ne Win kitawp a, party tuamtuam bulphuh a kitelna ( multi-party election) neih ding a kiphal ciangin Zomi National Congress ( ZNC) min tawh 1990 May kha ( 27) kitelna pan Tedim constituency ah Member of Parliament (MP) a ngah hi. Tua kitelna pen galkap kumpi in thukim lo in kitelna pan a cing MP te gambup thuneihna ( state power) piak ding nial uh a, Party pawl khat ( ZNC ki hel in) a phiat uh hangin Pu Cin Sian Thang in Zomi leh Zogam taisan ut lo a hih man a ma upna mah lenkip tinten lai hi. ZNC party a kiphiat sak hangin ZNC makai te in a mau nasep tawpsan tuanlo uh a, 1998 kum September 16 ni in National League for Democracy (NLD) leh mualtung mi te party dang te tawh kipawl in Committee for Representatives of People’s Parliament ( CRPP) na phuan khia uh a, kawlgam sung mailam kalsuan zia ding gelna leh malakna ah kihel in na nakpi tak in sem hi. Kawl galkap kumpi nasepna deih lohna hangin leh mualtung mite mailam hoihna
ding deihna tawh mualtung mi party tuamtuam tawh kipawl in United Nationalities Alliance (UNA) phuan in leitung makaite theih ding in kawlgam mualtung mite thuakna te hangsan tak in na gen zel hi.
Pu Cin Sian Thang pen kawl gam galkap kumpi deih lo leh a lang pang mi te a hi, Zomi te sung bek ah makai hi lo in, kawlgam bup mualtung mite kipawlna ah zong makai khat a hih bangin galkap kumpi in a ma gamtatna khempeuh encik den uhhi. A mah om kei leh, a hih kei leh a mah thazawm leh a mau ( galkap) kumpi te a dingin a mau hoihlohna a gen ding mi leh a langpang ding mite tha zawm tuam mahmah ding a hihna teltak in mu uhi.
Hih bangin minam makai Pu Cin Sian Thang i neih leh lam ( property) te galkap kumpi te’n a nawk sese uh pen a deihna uh tampi om ding hi. Galkap kumpi te in zong Pu CST pen a nawk ut na uh sawt mahmah zo ta a hih hangin mawk nawt ngamlo in lampi dang khat tawh a nawk uh a hihi. Hih bangin i tenna gam sunga i neih leh lam te a nei te phalna om lo pi’n laksakna pen thukham pualam a nasepna a hih mahbangin a thuak te a dingin zong i dah pih mahmah hi. Kumpi te in gam mite hut ding leh vengbit ding tavuan nei uh a, gammi te gawtna pia kumpi te pen a thu manlo kumpi a hihi.

Tual Khan Suan ( Suanpi)