Nong dot khat kong dawn mangngilh om: Inn bangzah pha? = Inn 120 khawng pha (Vengpi ah), Inn 30 (Hausapa veng ah) a kici in thei ing. Vengpi ah Tedim kampau teng teeng hi a, Hausapa veng ah lusei kam pau teng hi. A kikal 1Km khat khawng pha hi. Gen suksuk ni. "Rev. Khup Za Go Tangthu" by Dr. S. Neng Ngaih Lian in a nuaia Sia GK Nang gen Murlen Vengtung thu tawmcik khat behlap zaw deuh a, ahi zongin kicing zo het lo hi. (Hih laibu a sim sa te in a kipatna ahih manin tel dingin um ing). A sawt loin Sia Nang in ama laibu hong hanciam leh tua ah a kimzaw in hong gelh ding ka um hi. Dr. Lian gelhna ah, "Tedim uk sunga om Kalzang, Muizawl, Suangzang leh Mualnuam panin Tedimmi pawlkhat Murlen khua ah pem uh a, Tedim mi bek zong inn 100 val pha uh hi" ciin laimai 1 - 2na ah gelh hi. Hih thu pen Murlen Chuanchung (or Murlen Vengtung or Murlen Vengpi)Presbyterian Silver Jubilee Magazine Souvenir ah kigelhna a et hi in ka um hi. Anuai ah Sia Nang in a gelhna ah JUBILEE MURLEN C.C. a cih ah C.C. pen Chuanchung (Vengtung) cihna hi. Pasian thu hong tun dan:"Murlen thupha ngah" ka cih theih zel uh pen Pasian thu ka theih uh ahi hi. Pi Ngai Kang (Thawmte beh a ci un thei ing, ka khial diam ah) pen nungak mel hoih mahmah ahih manin Hausapa in a tenpih hihtuak hi. Amah pil ahih manin amite hong khual siam a, Welsh missionary te in Mizogam sung ah Gospel hong puak uh pen Zomi lak ah zong hong kizelh theihna dingin ama panlakna khat ahi hi. Tua pen amau Hausa innsung pan khuasung vaihawmna dingin zong akisam mahmah ahih ding um ing. British kumpi in a paina peuh ah Gospel tawh colonial policy a zatkhawm bangin Murlen Hausa te in zong khuasung ukna dingin a khuami khempeuh Christian a suah ding a hanciam uh hih tuak hi. Hih pen a biakna (Christianity) a thupi sak mahmah man uh hi masa dingin ka um kei a, Khuasung Ukna dingin kisam, Khuasung vaihawmna a ol mahmah na dingin kisam zong ahih ding ka um hi. Tua dingin Hausapa in a zi masawl in Zomi lak ah Gospel hong tangko hi kha ding hi. Tua hi leh Zomi khempeuh leh Hausapa veng lama te a lungsim uh hong kibang ding, biakna hong kibang ding, vaihawm khat peuhpeuh kithutuak diamdiam theita ding cih ngaihsutna om hi kha ding hi. Administrative convenience dan ding ahi tam cih theihna ciang om hi. Tua hi lo a, a biakna mahmah zong khanglui biakna kithoih den te sang hoihzaw ding a ngaihsutna uh zong hi kha inteh. Thu tampi om in um ing (Thesis cing ding thu om ding hi). This for another research. Vengpi pen Hausapa adingin a siahkaihkhawmna a tamzaw hong lutna hi a, saliang zong tam a sanna pen hi a, Buh, Vaimim, Taang, etc. tam a ngahna mun pen ahih manin thupi mahmah hi. Tua manin Hausapa in zong zahtak mahmah a, Upa vaihawm ding zong tampi na la hi. Lawm leh gual in na nei a, na it mahmah in, na pahtawi, zong pattah hi. Hausapa tate bang tuni tanin Tedim pau pen siang sensen lai hi. La zong tampi sa thei bek lo, paunak, lakam, etc. kei sang theizaw uh hi. Shillong ka sangkah lai in ko khua Hausapa tapate 2 om ahih cianga ka kimuh sim un, "Na mintap pan pen Pasalpha ahi a, a samat pen ka ngaizo kei uh hi. A zu khum mahmah a, la ka sa khawm zel uh hi ciin Hotel ah niang hong dawnpih kawmin Zola hong awi diatdiat mawk hi. Kim leh pam a ten hong en dimdem mai. Aman 'mo zong Tedim pau zang mah ka la hi'" hong ci hi. (Theih ding khat pen Hausate pen Kumpi in Hausa a beisak ciangin a zakta, nuamsa lo in mipi lak pan a kiseel, a kibu, a kihemkhia, a tai, a peem uh hi a, kisungsia, aana, mahmah uh hi. A Hausa sep lai vua a thupaisak dan uh mipi a heh om kha leh court ah kitun ding cih a lau mahmah uh hi. A liat lai un lian lua mahmah ahih uh cianga).Tua mana a khuapihte uh pen a mai etet uh kulpian hita hi. Evangelist Pu Son Lang:Pu Son Lang pen Suangzang khua pan hi a, amah pen a teek dong zi neilo hi. Ama beh thei kei ing. Sesih-Leisenzo khua hi a, a khuapih te Ngur, Vapar leh Murlen ah om ahih manin hong zin kawikawi zel hi. Amah pen Christian na suak khin a, ama biakna zuih pen hong tangko zel dan hi. Murlen hong zin ciang Ngur hong tawn masa, vapar ah hong bang phei, tua ciang khua hong tunga, Lai Siangtho a bu khat (Cope Topa in kum 1936 a tei masak Tedim Lai Siangtho, Thu Ciamthak bu), pen a kawm savun tawh a kibawl, a vom, a pan liklek a lenuai ah zep in hong zin tung zel hi ci uh. Khuasung ah pai in, mi a tuah peuh kiangah a liang ah kawi in, "Nang Pasian thu awi dingin hoih tak ve teh aw" ciin paisan zel hi. A ban gen dan ding zong theituan lo hi inteh. Tua bangin khuasung ah pai laanlaan zel hi ci. Mi bel ngah pah tuak khol kei. Ciamnuihna kigen a, Solfa pen..... Do-Reh-Mi-Fa- Son-Lang- Cil-Dawk- khawng peuh cih sak zanzan uh hih tuak. Aman phamawh sa tuanlo hi. A tek a sih ding tan in zong zi neilo ahih manin khualzin den a, Sesih leh Murlen kikal (ni 2 khe tawh pai) pen kileh den in, a khuapihte kiangah a gensa kammal pen mah gengen lel hi. A kammal khek ngeilo kici hi. Tua pen tu hun ciang thu theiin a kan kik uh ciang EVANGESLIST thupi mahmah leh Zomi sung pan a masa hi kici hi. Murlen, Vapar, Ngur leh Sesih in nakpi takin pahtawi uh a (a sih zawh ciang, tu nai mahmah in), inn lam le uh Evan. Son Lang Memorial Building khawng ciin a thupina phawk saan pan uh hi. (A thu tampi omlai)...... ..... Zomi te thu laigelh ding tam lai tak veh aw!!(Hong saupianta ahih manin hunsak phot ni) Hau Za CinPhuitong Liim