Zolai sinbu taanlang
A= Ak khuang ta thawh hun ta
B= Bi le lo gamlak po
C= Ci om lo sa lim lo
D= Dial khai khai limtak khai
E= Et lawm mual kuam Zogam nuam
F= Febuary 20 nih Zomi namni hi
G= Gam aa ding na sep ding (Gataam tui khuang tawh lui)
H= Ha nawt siang lup ding ciangh
I= Inntual zaang lamsaaina
J= January theino si
K= Khuado pawi kum cin pawi
L= Lawm le gual lung ki hual
M= Mui tung mui pei ki peipei
N= Nai lap in saang kah in
O= O laimal bem velval
P= Pilna sin limtak sin
Q=Quinine kha nattunza
R=Radio nei thuthak thei
S=Sya peuh mah zahtaak pah
T=Tedim pau eimau pau
U=Um le beel siang ding geel
V=Vaaimiim lum zuak le'ng sum
W=Wale ngasa nawi ne nga
X=X-ray natna thei
Y=Yak ki ci ngambawng hi
Z= Zomi te han lungciam khangto diam
Tu laitak a i Zolai na cihcih uh pen Zolai hilo in Chinlai ahihi. Banghang hiam cih leh hih lai in taangthu anei gige khat ahihi. Hih tawh kisai in muhna pawl khat i ensuk ding hi.
Zogam hong tung masa Sangmangte in hong muhna ah Chin ci in hong theitel pha diak ahi uhhi. Tua hi in Tedim, Hakha, Falam cih pen Chin ahih manun a laigelh zia uh zong kibang leh hoih ding hi ci in hong pat khiat sak uhhi. Tua tungtawn in lai hong bawlsak uh ciangin Roman Alphabet hong bulphuhsak ahi uh hi. Amau sepna nuam dingin hong vaihawm uh hi.
Leitung gam tuamtuam ah zong hih Roman alphabet mah kizangh napi in a sim uh ciangin a awsuak kibanglo se uhhi. Tua pen banghang hiam cih leh amau minam, amau pau/lai a thupi saknop man ahihi. Gentehna in Spainte bang colonist a hat masa gam ahih manin Philippines gamsung pen amau lai zuisak zo mawk uhhi. Tu a Filipino a kizang pen a bulpi en lehang Spain lai a bulphuh na hihi. A gam sung a Silliman University omna Dumaguete City a cih bang pen ei Zomi, midangte sim dantawh kibang lo in Du-ma-ge-tee ci in sim uh hi. Yvan zong Ivan ci in sim uhhi.
Cope topa in Zogam ah lai hong bawlsak ciangin Chin a cih mite lai pen kibang leh hoih ding hi cih ngimna tawh hong bawl khia a, Falam leh Hakha tadingin Tedim ta tawh teh na in amau lai pen buai na tam om lua lo hi. Falam leh Hakha ah Tedim zah in Homograph zong omlo hi. Tua hi in amau adingin Chin lai pen nakpi in kizangh suak thei hi. Hakha te in t leh t nuai a tah khat neithuah in khanto uh hi. Falamte in zong hun khat lai in aw leh o pen buaipih mahmah ngei uh hi. Tedim adingin aw leh o pen buai pih ding ahi kei a, a kikhen linlian ahihi. Gtna. hong=open; hawng=cover, husk, lawh=basket; loh=settle down. Zolai ah hih "o" leh "aw" a khen siamlote pen awsuah a khen siamlote ahi uh hi. A dah huai ka sak ah a beisa in English-Tedim Dictionary bawl pawl khat in zong hih o leh aw khen theilo lai uh hi. Midang tadingin kibang kha ding a, Zomi tading in ahih leh kikhen linlian hi.
Tua hi in Zolai a cih taktak pen a kimu khia zo nailo ahihi. I kansut ding a, a sawtlo in imu khia ding hi. Contextual bulphuh in Zolai gelh lehang Zolai picing hong suak pan ding hi. Tu a I zat pen Chin-Zolai ahihi. Zolai taktak igelh nop leh Laipian Pau Cin Hau kanzia pawl khat etkak ding kisam ding hi. Zomi sungah amah bek Zolai a phuan a om ahihi.
Zolai tawh kisai in a kikuphuai, a ngaihsut huai pha mahmah thulianpi khat Zomite in vaipuak a nei gige ihihi. Thupi ahih manin a buaipih, a kitotpih zong hong om phial ding hi. Banghang hiam cihleh a thupit man ahihi. Hun la in a ngaihsut huai ahihi. Hizo leh a vei zaw deuh tengin research bawl in Zolai a muhzia uh hong gelh leh tua laibute tungpan in a tawpna ah Zolai cih ding I khensat zo pan ding hi. Hih Cope topa in zat tawm dinga hong bawlsak Zolai tawh 22nd Century lutlo ding hihang. Cope topa in ipuah tohtoh dinga hong patsak pen kipuahto lo ahih manin standard neizo taklo in tuciang a om ihihi.
Zolai tawh kisai avei Rev. ST. Hau Go in zong labu khat na bawl khia hi. Rev. Gho Khan Dal in zong ama muhna tungtawn in article tampi zong gelh khia hi. Linguist Henderson in zong isin phat theih dingin a awsuah hong thuahsak in etkak theih dingin laibu khat bawl khia hi. Hih laibu teng bang enkak lehang Zolai mailai ding a malgawm zia tampi hong huh ding hi. I theih dingah Linguistte sep pen a omsa lai bangci pianzia nei cih a kan bek hi in puahpuah lo uhhi. Tu a Zolai pen a omsa lai ahih hangin a bawl khiate Zomi hilo ahih manin Kum 100 khit ah kitam zat theih nawnlo ding hi, midangte' laitawh etkak na in. A kikheel taktak ding hita hi.
Lai pen a awsuah a kigelh hilo in, a khiatna, a thu tawh a kigelh ahihi. Tua hi in Khua igelh ciangin "Kho", Khaw", "Ko", cih bang tawh gelh ding hilo in, a khiatna bulpi Khua mahin kigelh dinga, asim ciangin "Khaw" cih bangin zong hong suah hun om ding hi.
Zomi itin Zolai khantoh ding a lunggulh taktakte in gen bek in hong neilo in systematical analysis (study hilo) hong nei in tua tungtawn in laibu hong bawl khia leh tua munah avei lam a deihsak taktak ahih lam hong kilang khia ding hi. I vei, I deihsak leh gen bek tawh kingah lo in suplawh ding zong a kisam ahihi. Tua bang hihna in man hong nei pan ding hi.
Awsuah
Zomi te adingin awsuah a thupi ahih dan midang tawh kiteh kak theilo hi. Tua hi in Henderson in zong a genna ah Zomite (Tedim) in "kh" aw neilo hi ci hi. Aman mah hi. Sanggam Hakha leh Falam, Mizo te in nei uh hi. Kh aw ah x suak hi ci in na genlai hi. Tua hi a, hih thu maan sa in Rev. Hau Go in zong Xristian Labu ci in hong bawl khia hi. Kh aw neilo in x in ging ahih manin x pen kh innkuan pih a hihlam kilangh mahmah hi, Zomi tading in. Maang tadingin a tuam khat hi leuleu hi. Hih kh aw a zang zomi sungah tawm bek om hi. Gtn. Sia JK. Kam, Sia TSKhai cihte pawl in kh aw zang uhhi.
Tu ni ciang dong izat Zolai pen a siam khin tadingin buaihuailo hi. A hizongin sin tawm dingin pen baihloh na ciang khat nei hi. Tua banah Zola taktak ciangin a aw maan in suaksak thei nawnlo hihang. Kei bang pen Zolai siam ka kisak leh Zola pawl khat ka sim teh, Zola siamte in a aw maanlo hi hong ci lai ahih manin kei sang a siamlo zaw tadingin maanlo kan ding cih ka phawk hi. Tua hi a hih Zolai pen zattangzang hilel in, la gelh nadingin a kicing zo nailo hong suak hi.
Zomi taktak hi ing aci te in ah hih Chinlai tawh hong lungkim zo taktak nawnlo ding uhhi. Banghang hiam cihleh a gelh lai in bun zolo ahih man hi. I Zolai tuni ciang dong a picin zawh lohna pen I kipat na a khialh man ahihi. Mizote in alphabet pen a, aw bi, chaw cih bangin sim uh hi. Ei zomite zong hih bang dan in isim ding ahihi. Tua ciangin a-z alphabet pen ei Zomite lai bucing hong suak thei pan ding hi.
En pen mikaang ta zui in a pen e ci hi hang. A diakdiak in awsuak (vowel) teng pen ilawh dan a maan zo nailo ahihi. A pen ei cilo in 'aa' icih teh, e pen I cilo 'ee', I pen ai cilo in 'ii', o bel maan khin, u pen zu cilo in 'u' icihteh Zomi tadingin hong dik mahmah dinga, hong muibun mahmah tading hi. I pau zia a kibang vetlo English ta zui ihih manin tampi a nawng kai ahihi.
Z-Zomite hanlungciam khangto diai: Zolaay
Lungdam,
Tung Thang
No comments:
Post a Comment