Kei zong Sia Kap Za Mang leh a innkuanpihte lungdampihna ka khak hi.
La khat:
Fifth best? No, No,
Fourth best? No, No,
Third best? No, No,
Second best? No, No,
I will not give unto the Lord,
Things that cost me nothing much at all,
He gave His very best for me,
So I will give my very best for Him.
Kum 1991 June kha in Shillong ah College kah dingin ka paisuk a, College sangnaupang te adingin English pau tawh kikhopna Collegiate Evangelical Student Union worship service (a tom in EU Service) ah ka kikhop ciil in tuni a Sia Kap Za Mang pen tua EU Service ah La Makai hi a, a tunga la tomno hong sinpih in, siamta cih ciang mipi hong dingto sak a - numei lam leh pasal lam hong kidemsak hi. Tua ni a ka muhdan a mel tu-in ka mitkha ah hong kilang tiaituai hi.
College pass a University a luttoh ciangin zong EU Service ah makai a sem toto khat hi in ka ciamteh hi. Ka cihnopna ah, pilna zonga inn lum lo lum nusia a nu leh pa tawh kigamla a a om hangin a khangnona, a hun awng hoihtak zangin Pasian zahtak in a nuntakna a kiseekpa hi ciin ka ciamteh hi. Daniel nuntakna hong musak tawh kibang kasa hi.
Kei adingin u bang hi. Shillong ah University Campus hawh ding pen thubaih hilo a, mikim kihawh mengmeng zolo hi. MA a zawh ding laiin ni khat, "University Campus hong en in" ciin hong tonpih a, Khasi ann minthang JADOH hong nekpih in, a room ah ka giak uh hi. College kah pan naupang khat adingin University ah giak kha cih pen "hamphatna lianpi" ahi hi. India Sehnel gam (Thar desert) lam en dinga a zinlaiin hong ngawngawh (neck tie) san liklek khat hong puak a, thusiam kasa mahmah hi. Naupang, upa khen tuamlo in 'mi' ahih nak leh a kibanga a bawlpa mit tawh a mutheipa hi in ka tuat hi. Pasian a mu te, Pasian thu tawh a nungta te nuntakzia pen zahtakhuai kasa a, a pianna a pa Pastor ahih man hi masa in ka um kei hi.
MA a zawh ciangin Rauburn College, Lamka ah Principal sem hi. Pasian huhna tawh kei zong MSc ka zawh ciangin Lamka ka zin kha a, Sia Mang in a Office ah niangtui hong dawnpih in, sanginn room tuamtuam leh Chemistry Laboratory khawng hong etpih a, amah tawh semkhawm a Chemistry subject hilh dingin hong cial hi. Ka zinma in zong hong gengen ngei khat ahih manin hong deihsak taktak hi cih ka tel a, ahi zongin PhD zomto suak nuam ka hih manin ama hong deihsakna ka picing sak kei hi. Mipil ahih manin pilna sangzaw zop pen hong theisiam mahmah hi.
Nung deuh in, cidam in US ka tun a theih ciang telephone tawh hong hopih vangvangin, "na dam hiam, cik ciang nong zin thei dia..... ciin hong vaidawn - Welcome a, mi gam mi lei ah zin ka hih lam ka mangngilh tuam hi.
Tu in zong Siampiza a kipiak ding thu telephone tawh hong hopih in hong hilh vangvang a, hong itna leh hong deihsakna ka ngaihsut ciang ka pumpi mahmah in kihel theileng ka ut pen hi. Tu lianin ahi thei nai kei zongin, ama la hong sinpih mah bangin Pasian adingin "a hoih pen" pia den peuh leng (always give my very best for God) ni khat ni ciang lungdam maitai in hong kimu sak ding cih ka lamen veve hi.
Ei khuavak hong puakte kiangah tu in i khuavak tangsak dingin Topa in hong makaih in hunpha hong pia a ....Pasian nasep lamdang kasa hi.
Sia Mang siampiza piakna hun Topa in thupha hong piaksak hen.
Deihsakna, lungdampihna leh itna tawh,
Hau Za Cin
Phuitong Liim
No comments:
Post a Comment