Cikha khua kum 50 cin Golden Jubilee vai i zakzel ciangin i lung khat hong phawng vengvang aa, nuamtuam mahmah hi. Zogam sungah khuapi tuamtuam tampi ka pai ngei kholloh hangin Cikha Myo pen a mun hoih pen pawl dingin lamen ing. Tedim khuapi panin 83 mile bang gamla a, Kawlpi panin 160 mile kim bang gamla hi. Cikha pen a khuamun hangin minthang hi. Khamtung gam ahih hangin zang kuak sung khat ah om a, lawilo kho-in nungta theimawk uh hi. Nidangin Than Shwe tanu bangin khamtungah zanglo om cih pen lamdang sa mahmah a, khat vei hong paisawm ngei-in Kumpi uliante bang buaisak mahmah ngei hih tuak hi. A khua geiah Tuivai lui luangin Kansauzang, Khuadam, Cikha, Mauvom leh Saipimualte in tua tuivai lui dungah phaizang hoih mahmah nei mawk uh a, nuntak gim nam zungzung hi. I meitei gun sangin kinuntakpih zaw mawk hi.Cikha panin New lamka ciang Motor lam om a, a tamzaw in Bazaar kai nai-in nei mawk uh a, gamdang sum ngahna khat hong suak hi. Tonzang
panin i paitoh ciangin Japan gal lai-a tank kisia 7 bang lamkim ah kitung veva aa, gallesa hanga siatna tampi a om a hih lam hong phawksak phapha hi. Cikha gam, Kansau leh Sianggial gamte hoih mahmah a Taaksing hoihte, ngeisok pakte in i zin ciangin i lung hong nuamsak mahmah hi. A gam hoih lai ahih manin gamlak sumpiang, pak nam tuamtuam, kenbal a kipan, baklawng; thaksing, cihte leh sakhi, sazukte, ngalhonnte belhna khat ahi hi.
Cikha khua pen na neumuh khak leh na kialkha ding hi. Midangte bangin khangto hi zen lehang a khuasungah lampi thum bang kisial in, inn a tul tampi kilam thei ding hi. Gamgi ahi zah khat in Cikha panin Behiang, India gam pen tai 9 bek pha hi. Gamgi a hih zah khatin Mobile phone te nangawn Indiate' cable system zatsak in kihoziahziah bek ta hi. A gal khat en lehang Zomite' kisak theipih zungzung Haiciin kawl kigal muh a, taihinn a kitung liapluap bang takpi ngei-in Mangkangte'n khua sa-in bomb a khiat khak tampi ding mah uh ahi hi. Tua hi a, Zomite' khuapi hoih mahmah khat a nei i hih lam i kiphawk gige ding thupi hi. Khuapi dangte bang lo-in Zomite' ki-itna, pilepu zu kikolhna, kipi kiteen nate leh behlebung kiuapnate i neih ciangin neih pen ganpite mah kigo liapliap lai ahih manin gamdang pai ding zong thupi luai-in kituat khollo zah dong dingin khua nuntakna pen namtui zungzung hi.
Cikha khua a it,
Suang Khen Pau
------------------------------------------------------------------
Dr. Cin leh Cikha lungluteng,
Cikha khua tawh kisai kilungluttek ahihman lungdamhuai sa ing.
Cikha ah kumpi sang tan guk na kah ngei ing. Sangkah hun kum khat bek ahihman leh kinaupang lai in bangmah kiciamteh taktak lo ahihna tawh kei omlai leh kei theihkhak thute anuai ah article dan deuhin ong gelhkhia ing.
Kei Theihngei Cikha Khua
------------ --------- -----
Kei omlai 1991 pawl in Cikha khua inn tam nai het lo hi. Inn kigawm in 500 kiim aphadiam cinuam ing(kei upmawh pong hi.). Khuahun(weather) pen nuam mahmah hi. Kei omlai ciangciang in Cikha ah Video Player leh TV nei omnai lo liang hi. Tua mah bangin Cikha ah Tekmit/Myatman (Glass) bulk om lo phial hi. Cassette player nei inn tam nai lo lai hi. Aneite inn ah Lengtong Pauno late khawng va ngai ngetngut in nuam kisa mahmah lel hi. Cikha khua pen Kansau zaang khua pan lut leng Zatopi kituak masapen a, tua Zatopi khuamong pan kipan in agal khuatawpna dong asauna pen Tai (Mile) khat leh alang pan 2 miles bang sau ding hi ci ing. Khe tawh pai leng kitung thei lo tawh kibang sa ing (Ki naupang lai zong hisam in cin).
Khua lai ah Sangpi (tun bel Cikha High School hita) leh tualpi(football field) om hi. Tualpi pen Cikha khua ading in Sport Centre pi khat ahihi. Nitak sim in Tukpeng kimawlna leh Akkha kisat miteng tawh gamlum thei mahmah zel hi. Tua tualpi alang lam ah mualbo nih om in aveilam mualbo pen Galkap len hi a, ataklam mualbo pen Palik len hipah hi.
Nitak nitum kuanta ciang in Galkap hon khat leh Palik honkhat lasa kawm, muktum kawmsa in ong tuaksuk zel uh a, tualpi ah kimawl zuahzuah thei uh hi. Kimawl aman uh ciang in tualpi kiang a aluang sialsial Tuivai guun ah kisil pah uh hi. Tua hun laitak in Galkap population pen 150 kiim bek omding in ngaihsun ing. Palikte zong tuazah kan hilo ding hi. Suun hunta in galkap honkhat Cikha pan Khen Man khua(India tawh Gamgi khua -Cikha tawh tai 5 bang bek kigamla) ah vapai zel uh a, Duty nei zel uh hi. Border Crossing nei sumzong/paizongte aupmawh uh leh thusit/dong in vanteng zong velsak/laksak thei zel uh hi. Cikha khua ah Galkap om atawmzaw tangval ahihman nitak khuamui taciang in khuasung ong lutden uh-a, nungak hel lai uh hi. Lampi khawng ah Guitar tawh vak in Sai Htee Sai lakhawng tawh nuamsa thei mahmah uh hi. Galkap Bupipa(bawk thumpa) pen tangval lai hi in, tua laitak Cikha Sangpi-a Kawl siamah thumte (Hmaw Be pan -Zangkong kiang pan ong pai)
helden hi. Kawl galkap leh palik tawh kiteng Cikha khuami numei honkhat mah om-a, tua hun lai in kilipkhap pong hi.
Cikha khua ding in Tuivai guun pen athupipen himai ding hi. Tuivai guun pen ciim mahmah a, zong vot phadiak hi. Tuuk tun ciang tuivai guun pen tuikhang thei lua ahihman lauhuai hi. Kum khat in galkapte nih leh thum tuivai lui ah siden uh hi. Tua tuivai guun kiimteng ah zaanglo pen bawng leh lawi tawh kikho in Cikha khua in ann khamzo hi. Zaanglo neiloten ahih leh ngeina mualtung lokhawh mah tawh nungta uh hi.
Kei omlai in Cikha khuabup ah Store (Dawr or vanzuakna) nih bekbek om hi. Zii (Shopping) lian bawlnuam/painuamten ahih leh Behiang khua lam zuan in India gam sung pan valei zaw uh hi. Tonzang leh Cikha kikal tai 50 bang bek ding kigamla hinapin Tonzang pan RTC mawtawte(lutom belbalte) kha khat in nih leh thum ong tungzo bek hi. Jeep zong bel om na ven kuamah kituanzo ciat lo hi. Lampi Tonzang pan Cikha kikal pen Mangkangte bawldandan mah bangin omlai zen hi. Mualkawi khua kiangteng bang mangkangte bawl Kattazasii (Tar) bang pen hoih lai lua kisa mawtaw hatzo liang hi. Cikha leh Tonzang kikal tua hun in ni nih bang khe tawh kipai in Mawtaw tawh ni khat kipai hi. Khat veivei tuuk hun bangciang mawtaw tawh i paisang khe tawh pai leng bang kitung baihzaw thei lai hi.
Kei om kum mah in Cikha khua in High School ngah ding cih news ong tung hi. Post Office masapenpen ding zong honna kinei thei hi. Cikha pan Kawlpi lai khak leng tua hun in kha khat bang sawtmawk hi. Tualai in Tanlang pan Tangiat dong class room khatciat bek om hi. Sang sungah Tanlang pan Tanli dong class sungah Zo pau mah tawh lai kihilh in, Myanmarsa bek kawl pau kipau hi. Tannga pan kipan bel Kawl pau zangh in kihilh a, atelmelmel lo tampi omzel hi. Kawl pau khawng tawh Zomi siaten ong hilh ciang sangnaupang pawlkhat nui kulkul zel uh hi. Siapipa pen Siapi Ngun Thawng(Khalkhate) hi in Tedim pau siam peuhmah in atate bang Cikha bek nuamsa uh hi. Cikha Sangpi ah Zolai Tanli dong kisin thei a, exam zong kinei ngiat sak hi. High School project omta ahihman Sangpi building thak lamding kipan ding cih ngimna tawh khualnawl ah Bricks(Oh Khe) kibawl ziahziah in kihal hi. Sangpi building ding funds zonna in ko sangnaupangten Friday ni nitak(Social Time
kineiden) ta in Buh-phieu khatta tawh buh-at ding in kikuan henghangden hi. Tua sangnaupangte buh-at na tawh kingah Sumte sangpi lam nading ah pai hi. Kei ading in ka Buh-at masakna pen hipah hi.
Cikha khua pen Khuapi(Town or City) dingin qualified mahmah mun ahi-a, mai lam hun ah development hoihtak leh Zomi tading mun thupitak ong hingel ding hi cih ka lamen hi. Ken Cikha ka muh kik nawn loh pen kum 18 sung bang ong hita cileng, tua kikal sungin tampi na kilamdang khin ding in ngaihsun ing.
"CI" tawh kisai
------------ ---
Cikha khua ah "Ci" piang nacih uhpen aman mah hi. Kei omlai in zong Cikha khua kiang khawng ah "Ci" tuiphualna om ngiat zen hi. Tuc tuite huai leng "Ci" in ong piang dan ahihi. Tua "Ci" kibawlte pen Cikha omten nekpi in kinei hi. Tawlbawk zong damsak kici zawmah lai hi. "Ci" khalte pen sunagtum kang mahmah bangin liak leng al cihtak in al hi. Kei omlai bangin ka omna ka Pute inn bangah Cikha khuasuak "Ci" bekmah kizangh zaw hi.
Other Resources
------------ ---
Tonzang leh Cikha kikal khua min teng
http://zomite. blogspot. com/2008/ 11/tonzang- leh-cikha- kikal-khua- min-teng. html
Chikha Location
http://www.tageo. com/index- e-bm-v-00- d-m606938. htm?Chikha
Chikha in Google
http://maps. google.com/ maps?q=23. 933+93.583+ (Chikha)&ll= 23.933,93. 583&spn=05.0, 05. 0&t=k&hl=en
Laigelh,
Paul Khaipu
No comments:
Post a Comment