NA MAWHNA NA KIMAISAK HIAM?

NA MAWHNA NA KIMAISAK HIAM?

Rev. Dr. J.M. Ngul Khan Pau

St. Augustine in mawhna leh Khristian nuntakna a genna ah hun li in khen hi. Tua hun lite hih bangin kikhen hi:

1. Posse peccare (Able to sin) Mawh theih hun (Adam leh Eve mawhna ah a pukma hun sung).
2. Non posse non peccare (Not able not to sin) Mawh loin om theihloh hun (Mawhna sungah puk zawh cianga piang mihing khempeuh).
3. Posse non peccare (Able not to sin) Mawh loin om theih hun (Jesu Khris sunga nuntakna ngah mite adingin mawhna tungah gualzawhna neih theih hun).
4. Non posse peccare (Not able to sin) Mawh theih nawn loh hun (Vantung i tung khit ciangin).

Tuni na nuntakna ki-en pha leteh mawh loin om sangin mawhna lamah a zongsang khinsa, lamphei pai bangin mawhna lampai na siam lam hi ding hi. Ahi zongin upna tawh Singlamteh bulah mawhna kisikna leh pulakna a nei khin mite adingin mawh loin om theih hunah na om hi. Topa Kha Siangtho vangletna tawh mawhna tungah na gualzo ding hi. Hun lina, vantungah mawhna om nawnlohna munah vantung mite bangin i nungta ding hi.

Tuni i gen nop thu ahih leh Jesu Khris sungah nuntakna a ngah sate ading ahi hi. Mawhna thu a kigen ciangin Singlamteh hangin mawh maina ngahsa i hih lam i phawk hi. Innkuanpihte mawhna, veng leh pamte mawhna maisak ding i hanciam uh hi. Maisakna zong tam veipi i pulak ngei hi. Ahi zongin ei leh ei i kimaisak ding haksa i sa uh hi. Sawltak Paul in Khristiante bawlsia leh Khris mahmah do ahih lam a kitheih ciangin a nuntakna kikhel hi. Tua zawh Khris maisakna hangin ama nuntak lui khempeuh mangngilh ding na hanciam hi. “Sanggamte aw, tua hamphatna a ngah khinin ka kingaihsun kei hi. Tua ahih manin a beisa thute mangngilh bawlin mainawtin ka hanciam a, Khris Jesu nasepna tawh vantung nuntakna-ah Pasian' hong sapna ahi hamphatna ka ngahtheihna dingin kung lam zuanin tangtakin ka tai hi,” (Filippi 3:13-14).

Nungzui Johan in, “Itna nei lehang launa omlo a, itna cingtaak nei peuh lehang launa beimangta hi. Bang hang hiam cih leh launa i cih pen gimthuak ding kihtakna hi a, gimthuak ding a laute pen itna cingtaak a neilote ahi hi,” ci hi (I John 4:18). Launa tawh a nungta lai mite gimthuak ding patauhna ah nungta lai hi. R.T. Kendall in tua bang mite ‘gimna nam li sungah nungta hi’ ci hi.

1. Lauhna tawh a nungta mi in tua lauhna hangin gimthuakna ngah khinzo ahih manin haksa thuak toto hi.
2. Pasian khut panin gim ngah ding lauhna tawh nungta hi.
3. Lauhna tawh a nungta mi in amah leh amah gimna kipia tawntung hi.
4. Lauhna tawh a nungta mi in midangte' gim ngah ding khual lo hi.

Pasian itna sungah na om taktak leh lauhna tungah na gualzawh ding kisam hi. Tua itna in gimthuakna lungsim, patauhna lungsim, kidek zawhlohna lungsim panin hong suaktasak ding hi. “Bang hang hiam cih leh Pasian in eite tungah meidawina lungsim hong guanlo a, thahatna, ki-itna, pumpi ki-ukzawhna lungsim hong guan' hizaw hi,” (II Tim 1:7).

Bang hangin na mawhna na kimaisak kisam hiam? Na mawhna na kimaisakna ding a hang nam guk (6 reasons to forgive yourself) om hi:

1. Na kimaisak ding Pasian deihna hi: Pasian na muhzia a dik kei leh na mawhna kimaisak ding zong Ama deihna ahih ding na um thei kei ding hi. Pa gilo neite adingin van a om Pasian zong i leitung pa tawh kibang dingin kingaihsun kha thei hi. Maisakna nu leh pate tung pan a ngah tanu tapate'n amau mawhna kimaisak ding tel thei uh hi. Na mawhna na kimaisak theih kei leh Pasian tungah a mawh na hi hi. Bang hang hiam cih leh Pasian thu in, “Kimuhdahna, hehna, thangpaihna, kitotna, kikona, kilungsim neihna khempeuh beisak un la, khatlekhat kihehpihin, lungsim neem tawh na kihozaw un la, Khris' hangin Pasian in note' mawhna hong maisak mah bangin khatlekhat na mawhna uh na kimaisak ta un,” ci hi (Eph 4:31-32). Khat leh khat mawhna kimaisak theih na dingin ei mawhna zong kimaisak ding kisam hi. “Nang na ki-it bangin na vengte na it in,” (Matthai 19:19) cih i mu hi. Nang na ki-it theih kei leh na innvengte na it thei kei ding hi. Hell sung hong tun ding mawhna Singlamteh hangin maisakna na ngah bangin, tua Singlamteh itna hangin nang mawhna zong kimaisak in.

2. Satan in na mawhna na kimaisak ding deih lo hi: Dawimangpa in Pasian maisaksa mawhnate zangin hong buaisak ding hi. Tua ciang Pasian hoihna, muanhuaina, a thuciam ah kip ahihna muang ngamlo dingin lungsim hong pia ding hi. Gupkhiat na hih lungdamna a bei theih na dingin na gupna zong hong kimuanglahsak ding hi. Tam veipi Pasian maisaksa mawhnate hangin hong lungkhamsak hi. Hong maisakna Singlamteh na et kei leh nang leh nang bek na ki-et leh Pasian maisakna na muangngam kei ding hi. Paul in Korinth mite kiangah maisakna tawh kisai leh Satan in hong mawhpaih nopna hi bangin na gen hi. “Note in mawhna na maisak uh ciangin kei zong a maisak ka hi hi. Mawhna maisak ding om ahih leh zong, mawhna ka maisak ciangin Khris hang leh note' phattuamna dingin a maisak ka hi hi. Mawhna maisak kei lehang Satan in nuamtaksa-in eite tungah hong gualzo khading ahih manin mawhna a maisak ihi hi. Satan' nasepna zia a theilo ihi kei hi,” (II Kor. 2:10-11). Na mawhna na kimaisak kei leh Satan tung panin hong khemna ding lampi honsa a koih na hi hi.

3. Lungnopna leh kimawhsakna pan suahtakna na ngah ding hi: Maisakna bukim na ngah ciangin nang leh nang zong na kisang thei ding a, Pasian in na kha bek it hi loin na pumpi mahmah zong a it lam na tel ding hi. Tua ciangin na pumpi siatna ding na gamta kei ding hi. Kimawhsak lungsim panin suahtakna na ngah ciangin na tawl hong dam ding hi. Bang hang hiam cih leh, “Topa' Kha Siangtho a omna mun peuhpeuhah suahtakna om hi,” (II. Kor. 3:17). Na lungdamna na mansuah leh mawhna hang hi kha ding hi. Khatveivei mawhna i bawl man hi khawl loin i lungsim panin mi pawl khat i maisak loh man hang hi nuam mahmah hi. Tua ahih kei leh midangte tuahphatna lungdampih bangin i kibawl hangin i lungsim sungah hazatna a om manin i lungnopna kimansuah thei hi. Dawimangpa nasep lian mahmah khat ahih leh nang leh kei Pasian maiah hong mawhsakna ahi hi. Johan in a mangmuhna ah Dawimangpa vantung panin kilawnkhia mu hi, “Bang hang hiam cih leh a sun a zanin eite' Pasian' mai-ah dingin i sanggamte mawhsakna a gen tawntungpa, tu-in vantung panin kilawnkhia khinta hi,” (Mang 12:10, Job 1:9-11, Zekh 3:1).

4. Na kimaisakna zah mah na manphatna hi ding hi: Nang leh nang kihehpihna lungsim na neih leh manpha takin kizat ding haksa ding hi. Na kimaisak kei leh zong Pasian in hong zat ding bangin hong zang theilo ding hi. Kumpi David in a tapa Absalom tawh hong buai ciangin ama khut sungah Absalom a sih ding thuak theilo hi. Bang hang hiam cih leh Absalom langpanna pen ama mawhna panin hong piang ahih lam telpha mahmah hi. Tua hangin Absalom a sih ciangin kumpi David amah leh amah kimawhsakna lianpi nei in thuak haksa sa hi. A galkap makai Joab in David, a tapa Absalom sihna sun-a a om laitak kiangah hih thu teng hong gen hi:

“Tua ciangin kumpipa' inn sungah Joab hong pai-in, “Tuni-in nangma nuntakna, na tanute leh na tapate' nuntakna, na zite leh na zineute' nuntakna a hong honkhia na nasemte khempeuh na maizumsak hi. Bang hang hiam cih leh nangmah in nang hong mudahte it-in nang hong itte na mudah hi. Bang hang hiam cih leh a ukte leh nasemte nang-a' dingin bangmah ahihlohna tuni-in na kitelsak hi. Bang hang hiam cih leh Absalom hing-in kote khempeuh tuni-in si le ung na nuam ding ka thei hi. Tua ahih ciangin tu-in ding in, paikhia in la na nasemte tungah kamneem pau in; bang hang hiam cih leh na pai kei leh tuzan ciangin mi khat zong nang kiangah hong om nawnlo ding hi, ci-in Topa' min tawh ka kiciam ngam hi. Hih thu pen na tangval-a kipan tu ciangdong na tungah hong tungsa siatna khempeuh sangin nang-a' dingin siazaw ding hi,” a ci hi. Tua ciangin kumpipa dingin kulhkongpi gei-ah a tu hi. Tua ciangin mite kiangah, “En un, kulhkongpi-ah kumpipa tu hi,” ci-in kigen a, tua ciangin kumpipa mai-ah mi khempeuh hong pai uh hi” (II Sam 19:5-8).

Na kimaisak kei leh nang zong kihehpihna buannawi sungah na kia ding hi. Bangzah in tua sungah na kah hangin kisikna, kibawlphatna hi loin, nang leh nang ki-it khial na hih manin phatuam lo hi. Mi pawl khatte'n a beisa hun a thute mangngilh theilo uh ahih manin zu dawn uh hi. Zu dawn hangin phatuam a bat hang, zu kham hun hong ven ciangin tua buaina na om lailai hi. Zu tawh siansak ding hi loin Jesu sisan tawh siansak ding hi.

5. Na kimaisak leh midangte na it ding hi: Mi tawh kikhawl theilote'n kisapna na nei hamtang uh hi. Midangte i mawhsak hangin a taktakin ei mawhna na hi nuam mahmah hi. Lawm ding mi om kei i cih lai-in ei lawm hi dingin a kizo lo i hih ding dahhuai hi. Midangte it theilo na hih leh nang kisapna hang hizaw kha thei hi. Maisakna in cidamna tun hi. Cidamna i cih ciangin pumpi cidamna mah hipah hi. Pumpi damna dingin lungsim damna kisam hi. Lungsim damna dingin hong sun venvan nopmawh nasak khempeuh a bei siang kul hi. Mi hazatna, muhdahna nei leng lungsim damlo bek hiloin a sawtna ciangin ka pumpi mahmah zong hong buaisak ding hi. Midangte na maisak theih kei leh nang mahmah tua na maisak lohna thang ah a awk na hi hi. Midangte tunga thupha naak hi dingin ei mah ah tua thupha hong tun masak kisam hi. Nang leh nang na kibuaipih nawn loh ciangin midangte na buaipih thei ding hi. Biakna dangte leh Khristian biakna a kilamdan mahmah na in, Biakna dangte in nang bek suahtakna ding kibuaipih dingin hong hilh ding hi. Ahi zongin Khristian biakna in midangte buaipih dingin hong lamlak ding hi. Khristian nuntakna hoih neite in midangte a khual, a it leh a huh nuam nuntakna hi. Rome 12: 4-8 sungah Kha Siangtho tung pan i ngah letsongte kigen hi. Rom 12:9-21 sung bang ah bangci-in midangte tungah thupha bawl ding i hi hiam cihte kigen hi.

6. Pasian in nang adingin a gelna na tun theihna dingin kimaisak in: “Bang hang hiam cih leh Topa in kong cihin-ah, mailamah lametna note kong piakkik ding, na siatna ding uh hiloin na phattuamna ding uh gelna ka neihte kei bek in ka thei hi,” (Jer. 29:11). Topa in na siatna ding gel loin na hoihna ding na gel khol hi. Tua bang gelna na tunzawhna dingin nang na kizawh kisam hi. Peter in a Topa thumvei a kitheihmawhbawl zawh ciangin nakpi takin kap hi (Matt. 26:69-75). Tua zawh nipi kal bangzah hiam zawh ciangin Pentecost ni in mipi maiah hangsan takin thugen hi. Bang acih leh hih bangin piang thei hiam cih leh mawhmaina ngen in tua ciangin amah zong kimaisak kiuhkeuh hi. Ama deihna na tun theihna dingin Pasian in, “Na paina ding lampi lakin ka hong hilh ding a, ka mit tawh hong enin thu kong hilh ding hi,” leh “Topa in mi a lam paina ding lak a, ama lungkim bangin a gamtapa amah in a kipsak hi,” (Late 32:8, 37:23). Ama cih bangin a gamtate hamphatna kamsang Isaiah in, “Nangma nopsakna gunpi bang ding a, na thumanna, tuihualte tawh kibang ding hi,” (48:17). Topa in na nopsakna gunpi bangin hong luansak nadingin na mawhna khempeuh Ama kiang pan maisakna na ngah zawh ciangin nang zong kimaisak in. Topa damna thupha nang tungah hong tung hen. //