Kennedy Space Center ah - 4 & 5

Kennedy Space Center ah - 4:


IMAX Theaters zawh ciangin 'Eye on the Universe: The Hubble Space Telescope (HST)' ka en leuleu hi. Hih mun ah HST sungah van nam tuamtuam leh a kizatdan cihte hong lak uh hi. Lai kigelh zong tampi sim theih om a, kisim khin manlo ahih manin a etlawm teng en in, lampi ah i tuakvat nungak melhoihte bangin ka peel pah uh hi.

HST pen April 25, 1990 kumin a kikoih hi a, tu in kum 19 pha ta hi. A nasep thupite lakah leitung kum 13.7 billion a upa hi (age of universe 13.7 billion years) ; cih leh leitung pan aksilom gamla pen 12 billion light years a gamla maan a zaih hi (farthest image seen are Galaxies 12 billion light years away).

Tua zawh ciangin NASA Art Gallery ah ka hawh leuleu uh a, van tuamtuam ka en uh hi. Tua pan Exploration in the New Millenium kici ah ka lut uh a, Interplanetary Exploration Passport kici ka la uh hi. Tua passport laibu tungah Earth Citizen Identification kici a, a sungah dotna tuamtuam om hi:

1. Leitung kimviala leng kawikawi ding huihlakah Research hihna ding innpi khat kilam a, tua bang hiam?

Dawnna: ISS (Internat ional Space Station)

2. Leitung kimviala leng kawikawi telescope khat in i omna Solar system khenlam na ngawn hong musak hi, bang telescope hiam?

Dawnna: HST (Hubble Space Telescope)

3. Mun guk a kisikkha ta, leitung pan ni 5 sunga kitung thei vantung aksi nam khat?

Dawnna: Khapi

4. Mailam ah mihing kipem thei dinga kilamen, leitung pan kha 6 sunga kitung thei vantung aksi nam khat?

Dawnna: Mars

Hih dotna khempeuh dawnna zong tua innpi sungah ompah ahih manin a banban in ka mu toto uh hi. Tua zawh ciang Coffee/Snacks kici sungah Burger leh Tuivot dawnin Space Shop sungah ka lutsuak uh a, KSC phawk tawntung na dingin van neucikcik (gen lo ding!) ka lei uh hi.

Tua pan maan kilakna mun ah maan kila in Space Center Tours ah Bus tuanna ding ngakin a vom a kang kawmlakah ka kigual phei uh hi.

2:10 PM a sat ciangin Bus hong kigual diudeu a, a banban in ka lut uh a, ko a masa lam ka hih manun Bus 4na ah ka tuangkha uh hi, ka nung vuah 6 khawng omlai hi in thei ing. Ka vekpi un kizui ngeetngaat in mundang khatah hong paipih uh a, lampi dungah, lamgei khawngah Mupi bu, Awle, Vasa, Vatawt cih khawng kimu pheiphei a, a sawtlo in NASA Building kici khat ka tungphei uh hi. Hih innpi pen vantungah a puak dinguh van (payload) guanna mun, a lawnto ding meitui bungpi tawh a kipehna mun (solid rocket fuel attachement) hi a, a vekpi in a buptuahna mun uh ahi hi. Space Shuttle peuhpeuh tua innpi sungpan vantungah a kilawnto thei lian dingin kipuakhia hi. [A kicingzaw in lawm Vungh Suan Mang attachement hong khak ah kimu thei hi]. Tua innpi gei ah May 11 cianga kilawnto ding puakna ding kilamta hi.

Tua innpi pel phei in ka tai uh a, inn gol mawhlo khat ka tung kik uh hi. A kongmaiah hong tuaksak uh a, innsung ka lut uh hi. A sung ka tum bektak uh leh Appollo 13 tuahsiatdan leh a sungah tuangte cidama tuipi tung pan a kihotkhiat kikna thu khawng a lim vive tawh hong lak uh a, a thu zong hong gen uh hi. Tua pan a sungah ka lut phei leuleu uh a, Khapi tungah a kah masak laivua Appollo 11 Control Room sung na hi gige hi. Tua ni (July 20, 1969) a tua sungah a tu misiamte kampau leh video te hong lak kik uh a, lungsim hong lawng mahmah hi. Neil Amstrong in, "The Eagle Has Landed" a cih khawng hong suaksak kik uh hi.

Tua sung pan paiphei suak leeng a sung lam ah Rocket pi teng na kigual bembam a, na kikhai zihziah hi. A huih pusuakna gol mahmah ahih manin lawmpa in, 'gol peuhmah si e maw' hong ci a, kei zong ka cihna ding dang theituanlo ka hih manin 'ahi ve maw' ka ci mai hi. Maan khawng kizaih in, video khawng zong, a paam ah Touch The Moon kici in Khapi Suang (Moon Stone) kikoih a, ka lawn laitak maan ka kizaihsak hi.

Khapi suang a kikhoihkha hi mawk ei, guai!!

Khapi tung kahte tuanna mawtaw Car, a puansilh uh Space Suit, a tuanna uh Rocket lim cihte kikoih zihziah hi. A sungah Khapi tung a kahna uh video a kilak ka et khit uh ciangin nitak nai 3:10PM hita a, van pawlkhat lei in, ciahna ding Bus ah ka lutkik uh hi. Hih innpi gei pan tuni taka kilawnto ding Discovery STS-119 zong kigalmuh a, launch pad ah dingin kiciang veetvaat hi. Mihing mel tuamtuam, Asian, African, European, Caucasian, etc. kihelkim ahih manin vantunggam a gen uh tawh kibang hilo hiam ka ci hi.

Nitak cianga kilawnto ding en dingte puakna Bus nitak nai 4:00 PM a dingkhia ding lap in KSC ka tung kik uh hi. Ko zong tuivot dawn in, a en dingin ka ticket uh lak in, bus sungah tuang kik dingin ka kigual kik leuleu uh hi.

A muh nop vive ki en khin napi nitum zawh ciang ka muh ding pen uh ka lawppen lai veve uh hi. Ahang pen, KSC ah mi tampi a pai uh hangin Rocket a kilawnto laitak muhkhak ding baihlo hi.

Oh boy, I am excited!

(zop lai ding)


Hau Za Cin
Phuitong Liim

Kennedy Space Center ah - 5:
Posted by: "Hau Za Cin" suante2002@yahoo.com suante2002
Fri May 1, 2009 10:21 pm (PDT)





Kennedy Space Center ah - 5:



Discovery STS-119 Kilawnto taktak ta: A hunciam nitak nai 7:43 PM ET a tun ciangin a sungah tuang mi 7 tawh vantung lamah hong lensan ta uh hi. A makaipipa uh Lee Archambault makaihna tawh ISS ah mei ngahna ding Solar Panel va bulh ding uh hi.

A kilottohna ah pai dingin nitak nai 4:30 PM ET satma in Bus khawlna mun ah mipi kigual zihziah a, sun-a Bus tuangsangin mi kitamzaw hi. Nai 4 pan ka ngak uh pen mi na tamlua mahmahta ahih manin a nung lam pek ka ngah uh a, ahi zongin ko nunga hong pai Japan mite in bel ko maiah Bus lut masa uh hi. Ahang: hih STS-119 sungah Japan mi khat Koichi Wakata, Mission Specialist tuang hi. Khapi tung kahna ding Apollo Program khit ciang vantunglam khualzinna ding Space Shuttle hun ah Japan mi khat a tuanna hi.

India mi Rakesh Sharma zong April 2, 1984 in Soviet Intercosmos Program hunlai in vantunglam khualzinna Soyuz T-11 sungah tuangin khual na zin ngei hi. Amau bel maanzaih a leeng kawikawi hi lel a, tulai banga vantungah nasep kician sem dinga kisawl cih bang hilo hi. Himalaya mual kim teng khawng maan zaihzaih lel hih tuak hi. India Prime Minister Indira Gandhi in, "Vantung pan India koi banga?" a cih leh, "Leitung khempeuh sangin hoihzaw" (Sare Jahan Se Achcha, better than the whole world), na ci hi. Tuate thu dang hi.

Nai 4:30 PM ET a hih ciangin Bus in hong pua vingvenga, a kilawnto laitak a kigalmuh theihna Atlantic Tuipi gei khat ah tutna kikoih zihziah mun ah hong tuaksak hi. Ka tun bektak un tutna nuam ka zong pah uh a, a maigual, lampaina nuam khatah ka tu pah uh hi. Ka gei vuah tu nuam mi hong kituh ngeingai a, zolia melhoih nono khawng hong pai khak leh ciin ka siit bawl uh leh hong kidawk omlo uh ahih manin a tawpna ah vunkang nungak melsia khollo khawng zong ka tusak ta mai uh hi.

Nai 5 pan nai 7:43 ngak cih pen sawtpi ding tawh kibang hi. Hun tomno sung tawh kibang hi. Beipah hi.

Ka nunggual vuah Japan mel vive Camera (hoih dinga ka upmawh uh) tawh hong kigual temtam uh a, lawmpa Thawngpu in, "hia camera te National Geographic khawngah miksi vak ciauciau khawng lianpipi a a kizaih theihna camera te hi" hong ci hi. Ka et uh Space Shuttle mihing cia bek a kigalmuh pen amau Camera tawh en leng ahihna cia mah tawh a kiangpan et bangin a kimu ding cihna hi. Ko tawi Camera hoihna bel ka video uh na et uh ciang kitel ding hi: http://www.youtube. com/watch? v=Ws4EVg1urB4

March 15, 2009. Ni hong tum hiaihiai, khua hong mial ding hita, nai 7:30 khawng hong sat ciangin a count down kipanta, 7:43 PM ET a hih lian in vantunglamah thakhat thu in kilawnto a, a nuai ah lungdam, lamdangsa, kilawp takin ka diang ngeingai uh hi. A ban..... (a video ah).....


Discovery STS-119 sungah tuangte:

1. Lee Archambault, Commander
2. Tony Antonelli, Pilot
3. Joseph Acaba, Mission Specialist
4. John Phillips, Mission Specialist
5. Steven Swanson, Mission Specialist
6. Richard Arnold, Mission Specialist
7. Koichi Wakata, Mission Specialist

A nasep ding uh:

1. Electricity ngahna ding Solar Panels bulh ding.
2. Tui dawn ding khaihsiangna puahpha ding (restore distillation assembly to get the ISS water recycling system up to full operation).

ISS a tun uh ciangin STS-119 makaipi Lee Archambault in ISS tawh kibuptuah dingin khaito a, Gamkuan 18na (Expedition 18) makaipipa Michael Fincke in a kilem hiam, a kibuptuah hoih hiam cih na encik hi. "Hoih hi" a kicih khit ciangin a kongkhak kihong a, a kuante leh ISS mun ah a omte kimu in, khut kilen thei uh hi.

Michael Fincke pen India gama "Assam sangnaupangte tawh kiho" i cih pen ahi hi: http://www.hauzacin .blogspot. com/.

A van puak uh 31,000 pound (14,061 Kg) pen suahkhia in, nai 6 leh a lang sung a sep khit uh ciangin zo uh hi. ISS ah meitha a pia ding Solar Panel, acre khat a lian, 120 Kilowatt ngahna meitha, science experiment hihna ding kibulh kimta cihna hi. Tua zawh ciangin zun khaihsianga tui dawn ding a ngahna uh Filter zong laih kik uh a, Discovery a ciah kik ciang lei ah kipuak kik hi.

Mailam ah Space Shuttle Endeavour STS-127 in Battery hong puak ding a, tua meitha kholna (battery) koihna ding zong STS-119 misiamte in bawlpah uh hi.

President Obama tawh kiho: ISS ah a ni tawpni uh, a zingciang leitungah hong ciahkik ding uh hita, tua ni in US President Barack Obama leh sangnaupang, astronaut pawlkhat leh Congressman pawlkhat tawh telephone in kiho uh hi. Huihpan in leitung bangci kimuh hiam? ciin president in dong hi, kici hi. ISS ah a omsa 3 tawh, a vekpi un mi 10 in President pa leh midangte hopihna hoihtak in dawng thei uh hi.

Lei ah hong ciahkik: President pa tawh a kiho khit uh ciangin ciah dingin kithawi uh hi. Discovery in ISS tawh a kizopna, a kibuptuahna khongkhia, lakhia, kitatsak a (undocking) , huthelo (thermal protection inspection) cih a theih uh ciangin ni 129 a omsa Magnus zong Discovery sungah tuangin lei ah hong ciahsuk hi.

KSC tukik taktak ta: A tuk masak sawm uh hunin KSC mun ah huih hatlua ahih manin Discovery in leitung khatvei kimvial in leng kik a, tua zawh ciangin huih nemta ahih manin NASA Mission Control in, "go" (tu theita uh teh) a cih ciangin March 28, 2009 3:14 PM ET in Kennedy Space Center Landing Facility ah tu taktakta uh hi.

Ni 13 sung a khualzinna uh zo in cidam in inn hong tungkik uh hi.

Innkuanpihte tawh kimu kik: KSC ah medical check up a neih khit uh ciangin a innkuanpihte tawh kimusak a, a zing ciangin Johnson' s Space Center, Houston, Texas ah paipih in "Vaidawnna" (Home Coming Celebration) neipih uh hi.

Thukhupna: International Space Station ah a kisam mahmah meitha kibulh khinta ahih manin mailam ah science experiment tuamtuam leh vantunglam khualzinna (Space Missions) tuamtuam kinei theita ding hi. Olzaw ta ding hi.

Takkheh!!


Hau Za Cin
Phuitong Liim