Swine flu leh Bird flu te ei a ding in a lau huai takpi mah hiam?
A bei sa kum 2003 pan 2008 sung lei tung mun tuam tuam (a tam zaw Asia sung a gam tuam tuam ah) ah Bird flu/ak nat-tun nat na hang in mi 300 kim bang in sih lawh in, ak tam pi leh sum leh pai tam pi ki sup lawh hi.
A bei sa ni 3 khawng a hong ki pan hong ki pan khia Swine flu/Vok nat-tun natna hang in Mexico gam ah tu ni (April 28, 2009) ciang a si mi 149 hong pha ta hi. Tua bek tham lo in USA,Canada, UK, Spain , New Zealand cih bang gam tuam tuam te ah zong tua Vok flu nei mi (mild cases) te mu khia ta uh hi.
Flu koi pan hong piang?
Mi hing leh gan hing nam tuam tuam (tui vasa tuam tuam, ak, va tawt,vok, zawh ngeu, eui, sahang, etc.) te tung ah flu (ei pau in "Nat-tun", kawl pau in "Tot-kuae") ih cih pen virus nam khat a hi "Influenza virus Type A" hang in a ki ngah nat na a hihi.
Hih lungno (virus) pen a diak in Vasa nam te neih tawn tung virus khat hi in, va tawt leh tui vasa bawl khat te bang in a mau pumpi sung ah virus a neih uh hang bang mah nat na thuak lo in, a maul eng leng/pai pai na lam dung dung ah virus ki zel sak mang uh hi.
Flu virus pen a mau sung a om Haemagglutinin (HA) leh Neuraminidase (NA) ki ci RNA segment nam nih tun tawn in a tuam(sub-species) in ki khen to lai hi. Tu ciang ciang HA nam 16 leh NA nam 9 ki mu khia khin ta a, tua HA leh NA te gel a ut bang un ki thuah in virus nam tuam tuam hong piang thei hi (Gtn: H1N1, H2N2, H3N2, H5N1, .... , H16N1, H14N9, etc.).
Vasa nam sung ah hih HA leh NA tuam tuam a nei virus te mu khia khin ta uh hi.
Flu hang a sih na te
A ma sa pen flu natna pen 1878 kum in Italy gam pan Edoardo Perroncito a ki ci pa in hong pholak khia hi. Tu ni ciang flu nat na leitung bup na sia tak in ki zel in sih na leh nat na a pian sak (pandemic )3 vei pha khin ta hi.
1. Spanish flu (1918)- H1N1 virus hang hi in, mi million 50 val bang si ding in ki um mawh hi. World War I sang in mi tam si sak zaw hi. ( tu ni dong hih H1N1 virus mi hing te lak ah ki zel lai hi).
2. Asian flu (1957)- H2N2 virus hang hi in, mi million 2 bang si ding in ki um mawh hi. Hih H2N2 virus pen kum 11 sung mihing te tung ah nat na apian sak khit cing in, hong mang thang hi.
3. Hong Kong flu (1968)- H3N2 virus hang hi.mi million 1 bang in sih lawh ding in ki um mawh hi.Tu ni dong hih H3N2 pen mihing te sung ah om thei lai hi.
Bang hang in Flu lau huai?
Ei mihing te sung ah kum sim in ih tuah den flu pen H1N1 leh H3H2 te hang hi pi pen hi.Hih virus nam 2 te pen mihing te sung ah a ki zelh zawh sawt ta a hih man in, ih pumpi in tua nat na do na (immunity) ih nei khin tek hi.
Virus thak a tam zaw te in ak leh vass tuam tuam a ding khuah mah mah in, mi hing ta ding in nat na piang sak zo lo hi. Tu lai tak in mipil te patauh mah mah na a hang in, ei mi hing te sung ah ih tuah khak ngei nai loh, a khuah mah mah leh mi hing leh mihing a ki lawh baih mah mah virus nam thak (highly pathogenic) khat hong pian khiat khak ding cih thu a hi hi.
Hih bang in ki lawh baih mah mah ( rapid human to human transmission) leh a gu khauh mah mah virus thak khat hong piang zen zen leh kua mah ih nat na do na tha (immunity) nei nai lo a hih man in a thuak kha mi a tam zaw in sih lawh ding in ki um hi. Virus nat na a hih man in, nat na do na za tui (vaccine/Kar- kuae-say) bawl zawh nang a tawm pen kha 6 bang sawt ding ci uh hi. A poi na khat ah Virus thak hong pian ma teng in vaccine ki bawl khol thei lo se hi.
Tua a hih man in, Virus thak hong pian leh vaccine ki bawl zawh ma sung teng pen mihing te a ding bang mah zatui nek ding om lo ding hi. Virus a that za tui (anti viral) a om hang in mi kim a ding ki ngah zolo ding hi. A diak in gam khang to nai lo a om, gam mi ta ding in lam et na tawm diak cih ding hi.
A ma sa pen flu pandemic hong pian lai(1918) in gam khat leh gam khat ki kawm nang in Tenbaw(Ship) ki zan lai hi. Tua hun lain a ngawn in, hih flu natna lei tung bup kha 2 sung in ki zel zo ci uh hi. Lei lu leh lei taw ni khat thu in ki kawm theih na tu hun in, virus thak hong piang leh ki lawh nang hong man lang mah mah lai ding hi.
Gam lian tampi te in tua hun hong tun khak leh ki gin kholh nang ci in "Emergency preparedness plan" nei kim uh in, a gam mi khem peuh a ding in za tui(anti viral) a ki cing in a neih ban uh ah, vaccine a man lang pen in bawl zawh nang zong ki gin sa in om uh hi. Tua virus thak in hong do sung teng a , a si te kaih khop ding dan, a nung talai ta ding bang cih pan pih ding cih bang ciang dong in ki kup kholh sa in nei khin phit phet uh hi.
Bang ciang Flu Virus thak hong piang ding?
Tu ni dong kua mah in a hun ding gen khol thei lo uh hi. A hih hang tu nai a hong piang thak Bird flu leh Swine flu te I et ciang a lau huai virus thak hong pian ang hong nai sem sem cih pen ki mu thei hi.
Mihing leh mihing ki lawh thei flu virus hong koi ci piang?
Mihing ta ding in a lau huai lo Bird flu pan, mihing khat leh khat a ki lawh thei a lau huai mah mah flu virus thak nam 2 in hong piang thei hi.
1. Flu Pandemic masa pen (1918) Bird flu virus pan in dam dam in hong ki khel in (progressive adaptation, mutation), a tawp na ciang mihing leh mihing ki lawh thei , a gu khauh mah mah flu virus hong suak hi ci in um uh hi.
2. A bei sa pandemic 2 na leh 3 na (1957&1968) te pen mihing te tung hong tun theih nang bird/ak sung a om flu virus in Vokpi pumpi sung ah hong ki puah pha in(reassortment) in, tua hong piang thak virus in mihing leh mihing a ki lawh baih thei virus thak hong suak sak hi ci in ki um hi.
A lau huai pandemic flu virus hong pian nang bang teng ki sam?
Mihing ta ding a lau huai flu virus hong suah theih nang thu 3 ki sam hi.
1. Flu virus in a gu khuah mah mah ding ki sam (highly pathogenic)
2. Tua flu virus pen ki lawh baih mah mah ding (ability to transmit rapidly)
3. Mihing leh mihing ki lawh zo ding (ability to transmit human to human)
Tu lai tak a hong lang flu virus te in number 1 leh 2 te cin zo ta hi. A thum na in hong cin ding bek in a ki sam lai suak hi.
Inn lam a, a ki ne ak puul leh vok puul te a lau huai mah mah nat na hi.Ak leh vok te a puulh nang a hang tampi om hi.
Gtn: Vok- Swine fever(Hog cholera virus), Ak- Newcastle disease(ND virus), Avian influenza (AI virus), Bawng, Lawi leh Sial- Foot and Mouth Disease (FMD virus), Anthrax (bacteria) cih bang lungno te hang in puul nat na hong piang hi.
A hih hang tua nat na lungno te in ak leh vok tung pan mihing pumpi sung ah teng in nat na hong piang sak zo/pah lo ahih man in bang mah a ki ci lo a hi hi.
Tu hun ciang natna lungno te hong khuah sem sem in ganhing pan mihing tung ki lawh baih mah mah ta hi. A hih hang tu ni ciang, a tang pi in mihing leh mihing a ki lawh nang baih nailo a hih man in a ham pha lai i suak hi..
Regards,
Zom lai zel ni.
Thangboi
No comments:
Post a Comment