ZOTAANG BUS zuiin Lengtong Kam Khen USA hong zin

Posted by: "Hau Za Cin" suante2002@yahoo.com suante2002
Sun Nov 9, 2008 2:03 pm (PST)

A mit limlang vom (sun glass) bulh in Zolia melhoih nonote kiangah tu phiuphiau in ZOTAANG BUS tungah tuang a, a ut ciang lasa, a ut leh ciamnui, a ut leh khutzak cih bangin USA hong tung hi. Moto hawlpa gei ah tu cih bang ahih tuanloh hangin nuam sa mahmah a, cim hetlo ngel ding hi.

Malaysia a pai laiin a sam san sak a, US hong zin ding ciangin bel a sam vomsak ta hi. Malaysia ah bel ZOMUS lasak pawi hi a, lasa siam vive kituah khopna ahih manin lasiam cih ciamtehna zong hikha inteh. US lam ah bel Hollywood movie star Tom Cruise te dan mah in mit limlang vom kisam mawk hi!

Hong zinkhiat ding ciang ZOTAANG BUS ticket la a, 'pai bek hilo a tai lianga a ciahna Tedim khua' pan hong zinkhiatna ding a khuasung, a khuapam, a lampi dung, Zogam hoihna mun tuamtuam video zaih phot in hong lak diadia a, a nusiat ding a lungzuan huai dan mit tawh hong musak ciaiciai hi. Tua tak ciang kikhakna la, a lawmte tawh "Innkuan Ki It Leng" cih sa khawm uh a, ZOMUS makaite zong kihel in limtak in uap uh hi.

Amah khakna hun ah lasiam tuamtuam in zong lasa uh a, lasiam Lia Lian, lasiam San Nuam, lasiam Nu Nu Mang (Titanic tumcip dinglai a la nunung "Nang tawh nai zaw nuam ing"), etc in zong dawng khat ciat sa uh hi. Lengtong Kam Khen Kum 50 cinna Live Show ah zong ama' tangthu a gen ciamnuih siam Pa Khup Mung (Zo Zum) in zong a hun khop sungkhia hi. Amah tungah dot nop tuamtuam dot theihna hun hong uh a, tua sungah a kidong pawlkhat pen: "Bang hanga biakna makai leh Pasian nasem Pastor te in mizawngte inn veh ngeilo a, mihaute inn bek veh zaw uh hiam?" cih khawng, "Topa Zeisu hong pai kik ding a naita hiam, hun nunung ahi ta hiam, pilna a kisin man lai diam?" cih khawng kihel hih tuak hi. Amau dawnna pen amah tektek tawh kimu a, dot kik ding hih tuak hi. Hiah gen nai kei ni. Zomi limciinsiam (actor) Tg. Khaipi (Thangno, Ngaih Anglai) zong kihel ci uh hi.

Hong pai ma a tuili gei khat ah a mit limlang vom bulh a a thu vaikhakna ah, ITNA cih pen a gen hak mahmah, a hilhcian ollo, a hilhcian thei bang om leh PhD degree piak huai a sak thu khawng gen hi. Nungak melhoih lo sang melhoihte mah tawh i kiho dan nop a sak zawk thu khawng uh a lawmte tawh kikum ciauciau uh a, a kikhakna thugente uh zaknop mahmah hi.

Lengtong Kam Khen ticket (DVD), Produced by ZOTAANG FAMILY tungah:

"HONG IT ZAW NING TOPA"
Tedim Labu sung leh Ciamnuih

Ageel: Lengtong Kam Khen
Anei: ZOTAANG PAUNO
Kum: 2008

cih kigelh hi.

Hih DVD hoih mahmah hi. Lengtong Kam Khen gelna zong hoih a, a sum leh pai tampi tawh minam leh gam itna tawh a hawmkhia Pa ZOTAANG PAUNO zong zahtakna i pia hi. Hih bangin i minam ading nasep khat ciat i matut ciangin i minam i gam a zuun hi hang ciin kei ka ngaihsun hi.

Hih ciamnuihna leh lasakna khui pen US hong tungzo a, a ngah masasa in lasaknate hoihsa in ciamnuihnate siamsa in nuihpih ziahziah uh hi.

[A ciamnuihna uh ka thukimpih loh khat om: Zomi nungakte midang nungakte zahin hoihzolo ... a cih sese pen uh. Hoihzo sa lua hang, hoih lua uh ahih manin minam dang tangvalte bangin hong it pih kiaukiau uh, a zi ding nangawn un hong laksak kiaukiauta uh hi. Hoih kei leh a vom a kang a san hizah lak ah ei Zolia ngo hilhialte hong lunggulh masa hetlo ding uh hi. Tua manin Zolia te hoih hi. Midang tawh teh in a hoihna zah uh bangzah pha hiam cih thei khang, ngapik uih tehna bangin melhoih tehna a om lam kiza nai buanglo ahih manin maw, ahih hang Zolia te hoih uh hi, ka ci hi.]

Phim bil vangah saipi 'khum' ding.... cih vai bel Lai Siangtho ah tua bang lianin a kigelh diam thei kha'ng, a ngai mipite in theizaw dingin tuat leng. Eden huan ah Evi a khem gul hi cih a lahna dinga Gul ok pa lauh mel, lipkhap pian, a laulo a lipkhaplo kineih pian (a hi tam maw)...tua mel zong muh teitei dinga hoih khat hi.

America khua tuamtuam ah hih DVD a zin kawikawi laitak hi a, a ciapkholhna hizah hisak ni. A dangte gen nawn loin, a en, a mu kha peuhmah nuihna dingin koihta ni.

Thu leh la tawh Zomi Zogam a zuun mimal kim tungah Topa in thupha hong piaksak tapeuh hen.

A lungdampih,


Hau Za Cin
Phuitong Liim