Khua phuuk domlote nuamsa ngeilo:Murlen

Posted by: "Hang Khan Lian" hangkl@pacific.net.sg
Sun Sep 14, 2008 6:43 am (PDT)
Tu laitak aa Zomi bup kalsuanna ahi R vai icihcih tawh kizawitawn sa kahihman in, "Khua Phuuk" cihthu Pu Khup Lian in Tedim Baptist Church - Yangon te Tin Jubilee Magazine sung aa agelhna tungtawn in kong hawmsawn nuamhi.Khua Phuuk icih in bang ahihiam?Mihing bawl ahilo, mihing hahkatna tawh akikhaam zolo tuahsiatna, natural disaster acihna ahihi. Gentehna in mi-khual nih kiho henla, khat in, "Tu kum an laak ahoih diam? An nahau ding uhhiam?" ci-in dong leh adawngkikte in, "Khua phuuk liang ituah kei leh hoih gawp le-ung kilawm" ci-in dawng kik theihi.Khua cih kammal pen Zomite kammal ah, thuthuuk mahmah hi-in mihingte khuak ii batloh, ihtelzawhloh te ah lawhna ah tamzat hihang. Phuuk cihpen ih gilpi kimteng, tanu satanh teng phuuk kicihi. Minuamsa, ankham, athau, agil golpiante aphuuksah kicihi.Phuuk-khong vei icih ciangin 'simguui' zong kici aa, nisa sung ah sauvei nasem, khualzin thabei lua, gil ah an omlo, cimawh, gimlua, tawllua tha omnawnlo, thazawcip cihna ahihi. Gilsung ah an gina omlo aa thabei luate ahihi. Khua phuuk tuak cihpen, huihsia guahsia, mincim,(innciim, lociim) meimual, zinling, tuihual, meikaang, nat gilo, natsia, puul, gal leh sa aa kipan natural disaster khempeuh Zokam aa lawhna ahihi. Innkuan khat bekzong hithei aa, khuabup, kualbup, gambup inzong tuaktheihi. Taanglai in khua phuuk tuah ciangin ki hamsa mahmah, neekding taakding omlo, mitampi in sihlawh, manlawh in anungta sunsun tezong neekding taakding omlo ahihman in sihding ut zaw phialzah hihtuakhi.Phuukdom cihciang in tuabang aa mi cimawh mi tuahsiate ahehpih, ahawm, ahuhte phuukdom kicihi. Adiakdiak neekding taakding ahawmzote hipha diakhi. Tuabang aa mi cimawh ahehpihlo, ahawm nuamlote, ankhing nangawn apia nuamlote "phuukdom nuamlo"kici aa, thupha ngahlo dingmi ahihi.Dom cih kammal leuleu pen gtn. in nausuakding agei pan aa huh aa, thapiate zong 'naudom' ci-in kilohi. Nupi papi gilkiallua, neekding neilo, gilkial noptuam nading, thuakzawh tuam nading aa puansia khawngtawh agilgaakte, "Amah leh amah aphuukdom" kici in kihehpih mahmah hi. Ih neulai in lutang gumnat, gilgumnat cihte ihNu te'n ongdom sak leh nuamtuam sa hihang. "Dom" cih kammal zatna ahihi. Thuakna pan noptuam nading aa panpih, huh cihna ahihi."Khua phuuk domlote" cihciang in tuabang hamsatna tuakte a enlote cihna hi aa, adiakdiak taanglai hun in, kialpi tung thei hamtang ahihman in kici mawh mahmah aa, khua kiim khua paam ah an kitaw theihi. Tua banghun ciangaa ahuhnuamlote khua phuuk dom nuamlo kici aa, tuabang hamsat ciang aa huhnuamlote akhan tuahphalo, mapailo uhhi ci-in ciin aa kinei ahihi.Tutaak Kawlgam in Khua Phuuk ihtuah laitak ahihi. Adiakdiak Zomite'n tuak phadiak hihang. Malaysia kumpi in ih khua phuuk tuah ongdompih aa ihlungdamna lianhi. Nituumna gam atamzaw in ong dompih ong hehpih ahihman in ih lungdamna lianhi. Tua bang mihehpih thei gamte Topa'n Thupha pia dinghi. Sengam, Singapore cihte in ih Khua phuuk tuah ong dom sangsik, metdawhna in ong nei uh ahihman in ei thu hileh Topa hamsiat ngahsak huaihi.Tuabang ihtuah kawmkal ah, ih kidom zawhding leh adom zo, adom nuam aa ih omding Topa tung ngetding ahihi. Khat leh khat kidom sangsik, zuau thu gen peuh aa kingawhngawh hun hipeuhmah lohi. Kidom cihciangin ankhing tuibuk, sum leh paai, neekding dawnding kipia kihuhpah zuahzuah ding ahipah zokei zongin, athu beek aa kitha piakding, nausuakdingte agei pan naudomte'n ahuh bangin, ihneulai aa ihnat ihsat ciang ih Nu te'n acilum uh akhutsung ah phih aa ongdom sak dan in, khat leh khat kidom ding thupi mahmah dinghi.Tua hileh ih minam kidom nopzia, ihlungsimpuak in Topa lungsim sukha pan ding hihang."Note kiangah konggen inah, hih kasanggamte aneupen khat nangawn nalimbawl uh ciangin, kei tung aa ongbawl nahi uhhi" (Matt.25:40)