"Buipi Lei kei inzong Khua ngai!"

"Buipi Lei kei inzong Khua ngai!"

1. 2008 kum hong bei in, 2009 sungah Pasian in hong puak a, Ama' hehpihna
lian mahmah. TV te, Media te ngai lehang, 2008 kum, thu hoih-thusia tam pi a
pian lam kiphawk kik: gentehna in; Kawlgam ah May2-3, 2008 in Huihpi nung;
tua kiim mah in Galkap kum pi'n Kawlgam ki uk na ding 'thu khun' ci leuleu;
Sengam Sichuan ah zinling; Zimbabwe ah kitelna om; Sengam mah ah Olympic
kidemna om; Rasia ten Goergia kap; Hurricane huihpi in America gam khen khat
susia; North Korea te'n Nuclear Cooling Power sukham; Kineihsiam Paul
Newman si; lasa siam Madona te kikhen uh; Congo ah kidona na om-mitampi
kihem uh; Israel Prime Minster na sep tawlnga; USA ah tangthu thak
piang-Obama President dingin telcing; US ah sumvai buaina lianpi
piang-leitung bup lok gawp; Thai ah gam makai vai ki buai tetu uh; Mumbai ah
Terrorist te'n hiamgam zang uh; cihbang thu tampi piang. Ei gam ah e? Zusa
laang mahmah. Tuk kitung lo. An lak ding omlo. Mitampi an nek ding nei
lo. India
gamah tampi kitai, cih te. Thu dang tam khop khat om lai ding. Phawk khak
loh tamzaw lai ding.

2. Zonet ah e leh? Zogamnet zong? Pastor te vai; Zomi & Chin vai; Gataam leh
uisuul thu; Regugee thu;... Zo Aw thu cih te a kipan a banban-a hunhun in
thu tampi tak hi mai. Tua leh, group net dangah e-eh! Khonomtung zong ai ve
leh!

3. Nung deuh lamin, Khonumtung news panin bang thu hong suak hiam cih leh
"Kawlpi gam huam ah, leitang bangcia zai, mipi te'n bang teng nei, lo acre
bangzah nei … cih Kumpi'n sazian dong hi" cih thu hong suaksak uh. Tua khit
zawh ciangin Falam gamah, a gam bangcia zai-mipi te'n bang teng nei, lo
bangzah kho, bangcia zai cih te, gan bangzah khawi, cih te Kumpi'n kaikhawm
…" cih thu hong suaksak leuleu uh.

4. 2007 kum sung hiam khatmah in, Tedim gam huam ahi, Zozang, Tanzang, …
khua pawl khat, Kawlpi gamhuamah guang dingcih thu ginga, khua mi te'n a
utlohna uh, a na pulaak/pholaak khiatna thu group.net ah hong suak ngei.

5. 1990s kiim panin, Zomi te adingin College khat kikoih ding a kicih hun
in, Haka ah maw Tedimah maw- Falam ah maw … cih bialbual tengin , hong
kitawknawn sak kawmkal ah, Tai 9 ah hong kikip sak. Amin bang hiding cih thu
hong ging leuleu a, "Khai Kam Colleg, Chin College … cih dan thu tuamtuam a
kizakkhit teh, "Kale College," "Kale Degree College" KaleUniversity" cih
hong hi toto.

6. Tuma kum 1 lai ciangciang, Tahan leh Munlai kikal ah signboard kisuanga,
"Welcome to Kalaymyo…Sagaing Division" cih dan khat om na pi'n, tun tua
signboard tunga laimal na kilaih ta. Tai 9 lamah tua laimal na kisuang.
Nidang hun in, leipi lamah hih signboard kisuang ngei kici.

7. Kawlpi leh Tamu kikal ah, khua thak 5 kisaat. Kum honpi khat mah hi khin
zo. Amin te Kawlmin vive-khuami te zong Kawl mah. Gullu mual e le … koi
ciang ciang hita? Zola khat hong thang ngei zo a, "Tedim… Tonzang…Tamu
…Zogam khuapi te…" cih tuhun ciangin kiza ngei non lo. "The homeland of
the Chin people" cih la, zaknop lua- Sangpi-Sung Tin Par, Kyo Kya-Sandy te
lasak siam lua uh-Salai Thawnah thu ciim mahmah ei.

8. Tu laitak a-Kawlpi gamhuam a om, Zomi te tenna khua min khempeuh pen,
Kawllai/Kawlmin bek in kivawh.

9. Dr. Vumson in *Zo History* laimai 214 ah bang na at:

* The Chairman of the Zo Council, Sonkholian, was not
a member of the government. His office was first established at Kalemyo, but
the Burmanns in Kale Valley protested its presence. The Burmans put up
posters, some of which read: "Historically Kale and Kabaw Valleys are not Zo
Country. Chin Blood is Chin Blood; Burmese blood is Burmese blood; Do not
touch the Burmans. Do not touch a property that do not belong to you. If you
touch it, it will be replied by fire. Burmese politicians of the Kale-Kabaw
Valley; are you sleeping?" The posters were signed by "Burmeses Youth."*

* *

10. State gam huam a kihawm hun lai in (1974 kum?), Kawlpi kiim teng khen
siangna lian omlo a hi kha tam? Koi ciang Zogam huam-Koiciang Kawlpi huam
cih. Bang hang? Signboard pen Lepi pan, Tahan, tun tai 9 ah. Kum bang zah
sungin, kum 35 huam sungin.

11. Tuma, kum sawm bang zah (30 ci diam, 40 cidiam khawng khat pan in)
zanglei lo nei pawl khat te'n, Falam zum leh Tedim zum ah i pai sangin,
Kawlpi zum ah pai lehang nai zaw cih tawh, lo gam sazian pen, Kawlpi zum ah
guang zaw uh cih khawng khat. Tua teng tawh Kawlpi gamhuam zai semsem dan
hileh kilawm. Tuni dong mah om kha lai mai ding.

12. Kawlgam suahtakna hunma in, Pu Con Bik in Monywa nai-Kani-Minkin dong
ama gam huam kici. Zogam saklampan in, Nawikai khua a kici hiam aw khat, tu
hun Kawlpi gamhuam a hi Zayokyo te tawh ki khuasa khawm ngei cih thu.
Kawl-Shan-Zo- adangdang te zong kihelzauna. Kawlpi pen Sakmi khangmi
kituntuahna. Tun tam semsem.

13. Israel te, Solomon maan khit, a tapa khangah gam nih kisuah. Sak lam gam
722/21BC in Assyria te'n do, zo, uk pah in, tua zawh ah a dawldawl in midang
khut ah sal suak suksuk, koiciang ah a tangthu tawp cih muhkhiat ding hamsa
mahmah. Khanglam gam pen, Babylon te'n 586 BC kiim in, na zo gawp uh.
Babylon te khut nuai ah sal suak uh. Late 137 in hong thei sak. Boney M te'n
la in sa. Minthang mahmah. A tangthu uh hong pai suksuk, 1948, May in,
Palestine gam ah, UNO in Israel gam cih ciapteh sak, suaktakna ngah. Gam
omlo-mihing hihna omlo (No nation-no identity). Gam om leh hihna om
(Nation/land creates identity). Ahihhang, tudong tangthu zozo nai lo uh.
Gaza ah kido na om den. Tusung mahmah in zong Gaza ah Paula Hancocks, Hamas
te buaibuai lai uh. Leitangh! Gamlei! Moses hun pek pan- Canaan gam kidelh.
Gam hoih kidelhdelh-tung dong hi lai.

* *

14. Muundang gal et pak lehang, Pin Oo Lwin pen Maymyo kici ngei kici a,
nidang in Shan gam kici ci. Tun Madalay gamhuam ah om.

15. Kachin gam, suangkhuk teng zong, koi ciangciang tung ta-bang thuthu om?

16. I gamah e leh, ei theih loh kikal in, bang teng ki semsem!!! Tuma kum 40
leh tu kikal ah bang teng kikhel? Mai lam hun ah bang teng a kikhel lai tam?
Na lunggel ngei maw? Na ngaihsun kha ngei maw!

Buipi leikei inzong khua ngai!

Dal Khan Mang

Dear Sia Dal Mang (Hong Kong a Pasian' thuthuk sin Sia Dal Mang mah na hih
ding hong um ing),

Minute khat sungin 2008 sung leitung thupiang teng nong kimvel pih khit
ciang phasak nai lo in Zomite' ading thului limci pha mahmah khat tawh net
memberte kum thak hong dawnpihin thu le la nong mop manin lungdam huai sa
mahmah ing. Net member ka lut khak zong hampha kisa semsem ing.

Hih na thusun nih vei thum vei bang na sim phapha ing. Ngaihsut taak ka sak
mahmah kawmin ngaihsutna kizomzom keei lai ahih manin kei zong tawm hong kum
dih ning e.

Nambat khatna a leitung thu nong etpih kik pak teng in Zomite i tuntunna pan
mai kum thak sung leitung tawh i kalsuan khopna ah thu tampi tak hong
ngaihsun khol sak hi. Zogam mautam kialpi tawh kisai-in Chin min tawh
leitung level phialin na kisemsem zel danin news tuamtuam ah suak zel a,
Zomi bulphuh lam pawl bel uke ake aham lam uh ka za nai kei hi. Chin
bulphuhte leh Zomi bulphuhte' adingin 2009 sung a ngaihsut tak mahmah maban
khat hi dingin ngaihsun ing.

Nambat nihna ah na gen mah bangin 2008 net sung thu kikupnate pen min
kituhna leh mimal bulphuhna tam lua pian lai in 2009 ah bel phadawm zaw deuh
ta dingin lamen hang. Laisim mipi a atamzaw in zong tam a huam theithei mah
i lunggulh ta hi.

Gam vai leh minam vai zong nong kuppih mah bangin a ngaihsut huai taktak thu
hi mah ei mate! Galpi Nihna lai a Israel misite zah lang zong apha nailo
Zomi/Chin mite i maban ding sah lai mah ei... Khaikam khua pan Tahan, Kawlpi
a pha ngei khempeuh in gamgi vai signboard kisuangte mu tek dingin lamen
ing. Gam dang hong om san asawt khinte' adingin zong i gam lam thu hi bang
dan ahih lam a theihna ding uh hong suak pah hi.

Gun khawm sak siah a om a sangzaw pilsinna sang (College) om khempeuh pen
Zomite' adingin hong kipia dan mahin ka za ngei hi. Gamgi leh signboard teng
phuhna mun kilaihlaih a, i inn tual zangah i phuhsa singlamteh teng hong
kiphuksakin i tangvalte kivuavua ta hi. Tattung pen i innlim zangah hong
kiphut nai lo bek ai dia? Nungak pawlkhatte bang hoh... E hi lam gen dah ni.
Kong biang pusuak leng thuneite in i ip sung nangawn hong sawk sak banah a
tuamtuam nangawn hong sawk sak ngam lai uh maw!! (Security ci in paulap bang
siam mahmah lai uh mate).

Kawlpi dung suk en pak leng: Kawl zia hoih lo teng in i mite tampi a siat
sak khit banah ei mi teng nangawn Tedim, Falam, Hakha, Mizo, ei tum tek...
Tua tawh pha leh pha ding pha nai lo, Tedim lamte bang Sihzang Teizang, Zo..
ultung sak nuam tek lai. Khua om lai, beh om lai... I sanggam Falam lamte
zong tuadan mahin kikhen suksuk lai veve uh mate.

Mizoram State gen ta kei leng Kawlpi dung suk ah zong Tedim/Falam/ Hakhate
pen i hih kaka kei sam hangin Mizote' nuai ah a om khin hi pianpian leng
kilawm sa ing. Kawl pau tawh Zo Minam Ni awng ngeingai i ci dia? Zo pau lah
awliatna sungah kiza lo, Zolai zong kisuang lo ahih teh. Zo-Chin sungah
Tedim lamte tam mahmah, Pawlpi vai ah zong upa mahmah napi zato khat Lai
Siangtho sang gina khat lah nei lo. Tualpi leh hall kician na ngawn nei lo
zat nop ciang mi teng mai et kul i hi mah na guai? Tua bangpipi tawh Common
name/language khawng ei' a otpihin ultung sak ngam ding maw leh?

Tun bel ZOFA, ZYA, Siamsin Kipawlna cih bang dan hong om ta in mailam i sep
khop siam ding leh lungsim khat nei gige a i kalsuan kul ding hi. I theih
loh kalin hong kivalh tum dekdek ta hi. Tahan khua sung teng en kawikawi
leng Mizo veng i pai teh zanin lampi mei tang a, Tedim lam mite' tamna mun
teng mial hi. Tuk ciangin Mizo vengah buan le tui kisik kha nuainuai loin
kattaza kibuak a, Mizote' tenna leh ten lohna pen meitang leh kultal kizut
lampi tawh kikhen thei lian hi!

Amau hau tuam uh a huhna ngah uh maw, ci leng lah Tedim lamte sangin nak
hauh tuak loh lua uh sa ing. Huhna zong ngah lo uh a, Tedim lamte zahin
gamdang pai zong tam lo uh hi. Bang hang ahi tam? Tedim lamte taih inn leh
mawtaw tawh a om tam mahmah veh aw, ahih hangin a sial kong gei mahmah uhah
tuk ciang buan dim keei.

Hih dan khawng i et ciangin i Pasian thu theih dan leh i nuntak zia in van
holh lam bekbek paksak, ei kia ngal khaat tat nuam lua lai i hi tam ci ing.
Biakna makai atamzawte' thu gen zong nipi ni a khengkhia zolo, biakinn huang
pua a kan zolo vanholh theology tam lua ai tam? Kim le pam nuntak zia pen
Pasian' mite' sep dingin tuat kha lo lua kha i hi tam? Ei tum tak a sial ek
tam i kisak hangin Galpi nihna lai a Israel misi zah lang zong pha nai lo
mawk i hih teh thu bel a ngaihsut huai mah hi ci ing.

Pulpit thugen dan pian hi leh Egypt gam sabel teng lunglenpih niloh in
Canaan gam lak ding a ngaihsun zo nawn lo hi leng kilawm hi. Biakna makai
tampite in Canaan gam la a ei' nek ding ei mahmah in sep tawm ding sang
Egypt gam salsuahna mun a pute' hong piak mah lunglenpih lai hi kha leng
kilawm hi. Takkheh!! Khangthak Zomi han lung cianm khang to diam!

Sia Dal Mang' gen mah bangin i Zo paunak ah *"Buipi lei kei in zong khua
ngai"* ci buang i hih teh Zomite gamlak i vak kawm kawm (Migration/Angsung
bek thei/Min deih lua) mahin khua ngai dih ni. I theih loh kalin i gam i
lei, i pau i ham, i biakna nangawn hong kinawm valh dekdek hi lo hiam? A
mihing cikciang hong kinawm valh tam? Tampi kinawmvalh khin lai hi. I dok
khia kik zo diam?

Sanginn ah Zolai i sin loh nungsang; zum neu pen nangawnah Kawl pau pau
theilote mi bang lo danin hong kimuh nungsang; khualai ah khangthakte Kawl
pau bekbek tawh akiho nungsang; Khangnote Zolai tawh zawl lai kikhak thei
nawn lo uh ahih nungsangin i minam hong kivalhtum dektak mah suak lo ding
hiam?

Negative lam tawh a gen nuam ka hi kei a, i dinmun leh hihna man tak
ki-encian-criticize ngamin change/flexible/ inclusive cih dan khat lungsim
tawh 2009 kum thak sungah kihanthawnin leitung level ah mapang khawm thei
ciat leng ka lunggulh man ahi hi.

Sia Dal Mang leh Zomi khempeuh "Kum Thak" thupha maw. God bless Zomi...

Rev. Thang Van Lian
Seoul, Korea