Taang huan dan

Ih khamtung lam-ah taang a tam keei ding ka sa aa, kuamah'n taang huan dan thei kei keei bilbel si hang ee. Ka neu lai un, inn lam pan taang hong ki khak teh, taangman ahih leh, tangho ahih kei leh, ki ngaan huan zel hi. Liagualnam in tangho bel thei khin hi ve cin maw. Buhman hi ta leh, taang hi ta leh ih ngaan huan ding teh tui tawh ki diah masa hi.(Diah loh in ngaan huan le'ng, min hak mahmah aa, min leh zong sak/hard mahmah ahih man hi. Sawtpi ih huan hang' a min lo bangin tang tiltul thei lai hi.) Zingsang tung aa ih nek nop leh a zan nitak-in, tui lum hiauhiau ( taang ih diah ciang' a tui ih sa'tsak luat leh, a min ciang' nawigawp thei lai hi.)tawh a taang/buhman a tuum dingin kidiah hi. Taang pen buhman zahin sawt diah kul lo hi. Nitak in ih nek nop leh bel zingsang lam in diah le'ng zong kingah hi.(A tui in tuum kei leh a taang/buhmah te'n, tui na huup ahih manin, a tung lam teng na keu thei in, min lo leuleu ahih manin, nitak in ih diah leh zingsang dong a tungtham a keu lo dingin tui a tuum aa kidiah ahi hi.) A zingsang teh a diahna tui ki khaihkhia/decant hi. Lawh/ciang zi'ing(container) cih te' sungah sung le'ng, a tui teng na luang khia in a tui a kan ciang' ngaanbeel sungah nahtangteh/ puan ki phah hi. Nahtangteh ih zat leh a nahtangteh pen tangho ih bawl ciang aa a bit theithei ih zat hang' ngaan ih huan ding ciang' a hu a lut theih nading in, a nahtangteh pen tawm ki vang sak aa, a taang a buakkhia'tloh nading in a thuapthuap in ki paihpeh(crossing) sakhi. A taang/ buhman ih guan khit ciang' a beelsiin ih si't maa in, puan paa ahih kei leh, nahtangteh mah tawh kisiin phot in, tua khit ciang' a siin tawh ki siin in a tuihu tam a leengkhia lo dingin, a beelsiin' gong zong puansia tui kawt sakin, ki siin cip hi. Mualtung lam bel an min hak in, Kawlgam khualumna lam bang ah bel min baih zawdeuh hi. Taangman kia zong ki ngaan huan thei-in, sageep khawng, be khawng tawh huankhawm le'ng lim zaw lai hi. Taangham pen ih beel huan leh, rice cooker tawh ih huan sang' a tui khit aa ih huan lim zaw hi. A tui khit kei le'ng buh nek in ki ne thei lo hi. A hoihbek aa huan theih ding haksa ahih man hi. Tu hun ciang' buhtui ki khit nawn loin, rice cooker tawh ki huan zaw ta ahih manin, tui khit aa an huan dan zong ki zang thei nawn mello mah ding hi.(Gamdang ah ih buhbeel/danbeel cih dan khawng ki tam zat lua nawn lo mah a'i ve.) Rice cooker tawh ih huan nop teeiteei leh, ih ngaan huan dan mah in, tawl khat diah phot in, tua khit teh ih huan taktak ding ciang' tui tawmcik bek tawh ki huan hi. A taang tungah tui khutmeneu cia (1 mm+) bang bek tawh ih huan kei leh, nawi lua pah lian hi. Tui tawh diah kholh kei le'ng deih bangin min thei lo hi. Ko' kiangah zong upmawh loh in, taang khawng vaimim khawng suksa tam bilbel hi ei. Zo an bel ih duh nak leh kingah mahmah cih ding hi. Zo Minam Ni khawng Khuado khawng ciang' ak taangciim leh sabuti(vaimin leh bawngsa huan) khawng a ki nezel hi ee. An zo teh khawng zong nei ung.Kawlgam ah ka lawmte pawl khat bang, taangman pen moh(confection) dan in bawl uh hi. Khum sak uh aa, coconut milk khawng tawh hel ahih kei leh, ih mai(pumpkin) te tawh a ciim in huan dihdiah napi uh, khum sak vet se uh hi. Butter khawng oatmeal(Kawlte' n taakuu hmonh) acih te khawng tawh zong millet cheesecake khawng zong bawl zanzan uh hi. An pi sangin, snack dan aa nek dingin, a ki nezaw hi mai ee. Tua bang ciang' a taangman pen hai lang(half) khawng leh tui hai 2 bang tawh sawt pipi a mei sa lua loin, so saksak uh aa, a taang mal a malh khit ciang' damdam aa ong man deda(sticky) in tua ciang' den aa, oatmeal, butter leh maida vui(flour) cih te [a helpih uh tam ngeingai ee] almonds, walnut, vanilla cih khawng tawh [hi teng bel a tuam aa pawi(hel) in] coconut milk kyaukkyaw dan hi mai. Tua khit teh tua mai ki huan a man deda pen a hul pian teh, a em nading beel(tray) sungah a thuapthuap(layer by layer) aa sung in, (sanuin makin) em/bake dan aa ki em cih khawng hi mai ei.Liagualnam in na omna lam-ah taang a tam leh a tuamtuam in na bawl in la, na ne dih aw leh. Kei bel tua bang biaibuai sang' ak pum khat khawng tawh aksa taangciim huan suk aa a ne nuam zaw hi mai ing. Ka cih teh, ih buaina leh, ih nek ciang' ih gilvahna pen kituak sa lo(not worthy) mai hi'ng ee. Mi tampi nek ding khawng cih loh maw.
Haukhek(Man Ngaih Hau)Tokyo, Japan
Taang pen hih US gam bang ah vasa, zulei an in nei uh aa, store tampi te ah ki zuak lo hi. Ahizong in Korean, Chinese store te ah pai leng amau zong Zomi te mah bangin Taang na lim neek veve uh cih ki mu thei hi. Kei zong a huan dan ka siam loh hang in i Zo an nam khat a hih na tawh ki zui in tua Taang ki zuak ka muh teh iplah in ka lei pong khe hel hi. Buh leh Taang gawm khawm in ka huan aa leh lim sim tham hi. Ahi zong in Taang tang kia huan dan thei lo ka hih man in a thei i om leh nong hilh na ding uh ong thuum ngeungau hi mai ing ei. Rice Cooker tawh ka huan leh lim puukpuuk kei mawk. A huandan khat om veve ding ka cih nop na hi. Khamtung lam ah taangman/hul ki huan leh lim thei mahmah hi ven maw.....